08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Պուտինը Թրամփի հետ գործարքներ կնքած միլիարդատիրոջը ԱՄՆ-ի հետ բանակցային թիմում է ներառել․ The Telegraph
Քաղաքականություն
20.02.2025 | 17:31
Միլիարդատեր Դմիտրի Ռիբոլովլևը, որն ապրում է Մոնակոյում և խուսափում է արևմտյան պատժամիջոցներից, ներառվել է Սաուդյան Արաբիայում ԱՄՆ ներկայացուցիչների հետ բանակցություններ վարող ռուսական պատվիրակության կազմում, հայտնում է The Telegraph-ը։
Նշվում է, որ հանդիպումից լուսանկարում 58-ամյա Ռիբոլովլևը նկատվել է ՌԴ արտգործնախարար Սերգեյ Լավրովի և նախագահի օգնական Յուրի Ուշակովի հետ Էր Ռիադի Դիրիա պալատում՝ Սաուդյան իշխող դինաստիայի նստավայրերից մեկում։ Անհասկանալի է, սակայն, այն դերը, որը Կրեմլը վերապահել է Ռիբոլովլևին։
Ռուսաստանցի միլիարդատերը ԱՄՆ նախագահ Դոնալդ Թրամփի հետ ուղղակի գործարքների փորձ ունի։ 2008 թվականին նա 95 միլիոն դոլարով գնել է Թրամփի Փալմ Բիչի անշարժ գույքը, գումար, որն այն ժամանակ ռեկորդային էր Ֆլորիդայի անշարժ գույքի շուկայում:
Ռիբոլովլևի հետ գործարքը Թրամփին թույլ է տվել ստանալ մոտ 40 միլիոն դոլարի շահույթ, քանի որ նա առանձնատունը գնել էր 41,3 միլիոն դոլարով՝ 2004 թվականին։
Պերմում ծնված Ռիբոլովլևն իր հարստությունը կուտակել է 1990-ականների սեփականաշնորհման ժամանակ, երբ իր վերահսկողության տակ է վերցրել «Ուրալկալի»-ն՝ աշխարհի խոշորագույն կալիումային պարարտանյութեր արտադրող ձեռնարկություններից մեկը:
2011-ին Ռիբոլովլևը 5 միլիարդ դոլարով վաճառել է իր մասնաբաժինը միլիարդատեր Սուլեյման Քերիմովին պատկանող ընկերություններին, որից հետո Շվեյցարիայից տեղափոխվել է Մոնակո, գնել տեղական ֆուտբոլային ակումբ, սկսել ներդրումներ կատարել արվեստում և շռայլ անշարժ գույքի գործարքներ կնքել: Մասնավորապես, Ռիբոլովլևը Հավայան կղզիներում գնել է տուն, որը պատկանում էր դերասան Ուիլ Սմիթին (20 միլիոն դոլարով), ինչպես նաև Հունաստանում երկու կղզի, որոնք նախկինում պատկանում էին միլիարդատեր Արիստոտել Օնասիսին (100 միլիոն դոլար):
Թարգմանությունը՝ Տաթև Ֆռանգյանի
