18.12.2025 | 01:35
Տհաճ միջադեպ՝ Արման Ծառուկյանի մենամարտի ժամանակ. ՏԵՍԱՆՅՈՒԹ
Մոսկվան անհանգստացած է Ուկրաինայում ՆԱՏՕ-ի երկրների զորքերի հնարավոր տեղակայման հաղորդումներից․ Պեսկով
Քաղաքականություն
20.02.2025 | 19:28
Մոսկվան անհանգստացած է ՆԱՏՕ-ի երկրներից Ուկրաինա ռազմական կոնտինգենտի հնարավոր ուղարկման մասին հաղորդումների կապակցությամբ՝ այդ երկրում խաղաղապահներ տեղակայելու՝ եվրոպացիների մտադրության մասին տեղեկատվության ֆոնին։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, գրում է Ինտեֆաքսը։
«Մենք, իհարկե, ուշադիր հետևում ենք այս բոլոր հաղորդումներին, հետևում ենք եվրոպացիների՝ այս հարցում երբեմն հակասական պաշտոնական հայտարարություններին: Սա մեզ համար մտահոգիչ է, քանի որ խոսքը Ուկրաինա ՆԱՏՕ-ի երկրների ռազմական կոնտինգենտ ուղարկելու մասին է»,- հավելել է Պեսկովը՝ այսպես մեկնաբանելով Մեծ Բրիտանիայի վարչապետ Քիր Սթարմերի՝ հաջորդ շաբաթ ԱՄՆ նախագահ Դոնալդ Թրամփին Ուկրաինայում մինչև 30 հազարանոց խաղաղապահ զորակազմի տեղակայման մասին ծրագիր ներկայացնելու լուրերը։
Պեսկովի խոսքով՝ «դա բոլորովին այլ իմաստ է ստանում» Ռուսաստանի համար անվտանգության տեսանկյունից։
«Հետևաբար, այս թեման մեզ համար շատ կարևոր է, մենք ուշադիր հետևում ենք դրան: Ուզում եմ հիշեցնել մեր արտգործնախարարի խոսքերը, որ, իհարկե, ՆԱՏՕ-ի անդամ երկրների ռազմական կոնտինգենտի տեղակայումը Ուկրաինայի տարածքում մեզ համար ընդունելի լինել չի կարող»,- ասել է Կրեմլի խոսնակը։
Նա նաև հայտարարել է, որ Մոսկվան տեսնում է որոշակի տարաձայնություններ, որոնք առաջացել են Վաշինգտոնի և Կիևի միջև։
«Մենք տեսնում ենք, որ Վաշինգտոնի և Կիևի միջև կան որոշակի տարաձայնություններ: Կիևի ռեժիմը սովոր է անվերահսկելի կախվածության, նրան դուր են գալիս օտարերկրյա հարկատուների փողերը, նա հավանում է այդ փողերի անվերահսկելի օգտագործումը։ Կիևի ռեժիմը չի սիրում ինչ-որ կերպ զեկուցել արդեն ծախսված գումարների մասին»,- հայտարարել է Պեսկովը։
Թարգմանությունը՝ Էմմա Չոբանյանի
