ՀԱՄԱՍ-ը Կարմիր Խաչին է հանձնել գերության մեջ սպանված իսրայելցի երկու երեխաների և նրանց մոր մարմինները

Պաղեստինյան ՀԱՄԱՍ-ը Կարմիր խաչին է հանձնել 33-ամյա Շիրի Բիբասի և նրա որդիների՝ 2 տարեկան Քֆիրի ու 5 տարեկան Արիելի), ինչպես նաև Կիբուց Նիր Օզից առևանգված 83-ամյա Օդեդ Լիֆշիցի մարմինները։ Պաղեստինցի զինյալները նշում են, որ բոլոր չորս պատանդները սպանվել են Գազայի հատվածում իսրայելական ավիահարվածների արդյունքում:

Հազարավոր մարդիկ, այդ թվում՝ ՀԱՄԱՍ-ի զինյալները և պաղեստինյան այլ խմբավորումներ, հավաքվել են Գազայի հատվածի հարավում՝ Խան Յունիս քաղաքում, աճյունների տեղափոխման վայրում, հայտնում է Associated Press-ը։

Իսրայելցի զինվորականները, որոնք արդեն ստացել են դագաղները, ավելի ուշ արարողություն կանցկացնեն, ապա դիակները կտեղափոխեն Թել Ավիվի Աբու Քաբիրի ազգային դատաբժշկական կենտրոն, փոխանցում է The Jerusalem Post-ը:

Քֆիր Բիբասն 9 ամսական է եղել, երբ ՀԱՄԱՍ-ի զինյալները 2023 թվականի հոկտեմբերի 7-ին ներխուժել են նրա ընտանիքի տուն, իսկ նրա եղբայր Արիելը՝ 4 տարեկան: Նրանց հայրը՝ Յարդեն Բիբասը, առևանգվել է նույն օրը, սակայն պահվել է ընտանիքից առանձին։ Տղամարդն ազատ է արձակվել փետրվարին՝ ՀԱՄԱՍ-Իսրայել գործարքի առաջին փուլի շրջանակում: Իսրայելի իշխանությունները պնդում են, որ Իսրայելի պաշտպանության բանակը առնչություն չի ունեցել պատանդների մահվան հետ, և նրանց մահվան պատճառը դեռ պետք է պարզվի։

Մինչ փետրվարի 20-ը ՀԱՄԱՍ-ն ազատ է արձակել 19 ողջ իսրայելցի պատանդների։ Սպասվում է, որ 6 մարդ ազատ կարձակվի փետրվարի 22-ին, իսկ պաղեստինցի զինյալները պետք է հանձնեն եւս չորսի մարմինները մինչև մարտի 2-ը, երբ ավարտվի գործարքի առաջին փուլը։

Թարգմանությունը՝ Տաթև Ֆռանգյանի