30.04.2026 | 11:00
Կառավարության նիստը՝ ՈՒՂԻՂ
Թրամփի հատուկ բանագնացն առաջին հանդիպումներն է անցկացրել Կիևում
Քաղաքականություն
20.02.2025 | 12:42
Ուկրաինայի և Ռուսաստանի հարցերով ԱՄՆ նախագահի հատուկ ներկայացուցիչ Քիթ Քելլոգը Կիևում հանդիպել է Ուկրաինայի ԶՈՒ գլխավոր հրամանատար Օլեքսանդր Սիրսկիի հետ։ Այս մասին իր տեսաուղերձում հայտնել է Ուկրաինայի նախագահ Վլադիմիր Զելենսկին, գրում է DW-ի ռուսական ծառայությունը։
Նրա խոսքով՝ Քելլոգը բանակցություններ է վարել հետախուզական գերատեսչությունների, հատուկ ծառայությունների ղեկավարների, ինչպես նաև Ուկրաինայի նախագահի գրասենյակի ղեկավար Անդրեյ Երմակի հետ։
«Մեզ համար կարևոր է, որ Քիթ Քելլոգը ստանա ամբողջական տեղեկատվություն այն մասին, թե ինչ է կատարվում ճակատում, մեր ազգի տոկունության և ոգու մասին, որոնք անփոփոխ են մնացել այս տարիների ընթացքում։ Կարևոր կլինեն մարտադաշտում տիրող իրավիճակի մասին տեղում գտնվող զինվորական հրամանատարության և հրամանատարների ճեպազրույցները»,- հայտնել է Երմակը։
Ինքը՝ Զելենսկին, մտադիր է Քիթ Քելլոգին ընդունել փետրվարի 20-ին։
«Մեզ համար շատ կարևոր է, որ Ամերիկայի հետ հանդիպումը և աշխատանքն ընդհանուր առմամբ լինի կառուցողական: Ամերիկայի և Եվրոպայի հետ աշխարհը կարող է ավելի հուսալի լինել, և դա է մեր նպատակը»,- նշել է Ուկրաինայի ղեկավարը։
Քիթ Քելլոգը Կիև է ժամանել փետրվարի 19-ի առավոտյան։
Թարգմանությունը՝ Տաթև Ֆռանգյանի
