Մոսկվան Վաշինգտոնին խնդրել է ապաարգելափակել միլիարդավոր դոլարների պետական ​​ակտիվները

Ռուսաստանը կցանկանար հասնել այն բանին, որ ԱՄՆ-ն ապասառեցներ իր սառեցված պետական ​​ակտիվները և թեթևացներ պատժամիջոցները։ Այս մասին The Moscow Times-ին հայտնել է Էր Ռիադում հանդիպման ընթացքին ծանոթ դիվանագիտական ​​աղբյուրը, որտեղ Կրեմլի և Սպիտակ տան բարձրաստիճան ներկայացուցիչները պատերազմի սկզբից ի վեր առաջին անգամ երկար բանակցություններ են վարել։

Աղբյուրի համաձայն՝  Մոսկվան ձգտում է վերականգնել ԱՄՆ-ում սառեցված միջոցների հասանելիությունը: Խոսքը մոտ 6 միլիարդ դոլարի մասին է՝ Կենտրոնական բանկի պահուստների մի մասի,  որը ներդրվել է դոլարային ակտիվներում մինչև պատերազմի սկիզբը։ Ընդհանուր առմամբ, արևմտյան երկրները պատժամիջոցներ են կիրառել Կենտրոնական բանկի 300 միլիարդ դոլար արժութային պահուստների նկատմամբ, որոնց երկու երրորդը՝ մոտ 200 միլիարդ դոլարը, արգելափակված է Եվրոպայում:

Ռուսական պատվիրակությունը, ըստ The Moscow Times-ի աղբյուրների, ժամանել է Սաուդյան Արաբիա՝ դիվանագիտական ​​ներկայացուցչությունների աշխատանքը վերականգնելու, ինչպես նաև Ռուսաստանի դիվանագիտական ​​գույքը վերադարձնելու պահանջով։ Կրեմլը հատուկ ուշադրություն է դարձնում Նյու Յորքում և Մերիլենդում գտնվող երկու ամառանոցների վերադարձի հարցին, որոնք Բարաք Օբամայի վարչակազմը առգրավել էր 2016 թվականին՝ հետախուզական նպատակներով օգտագործելու մեղադրանքով։

«Պուտինի համար այս հարցը միայն խորհրդանշական չէ, նա դա դիտարկում է որպես ԱՄՆ-ի հետ հարաբերություններում Ռուսաստանի կարգավիճակի վերականգնման մաս»,- նշել է աղբյուրը։

Նախագահը հանձնարարել է պատվիրակությանը, որի կազմում էին ՌԴ ԱԳ նախարար Սերգեյ Լավրովը, նրա օգնական Յուրի Ուշակովը և ՌԴ ուղղակի ներդրումների հիմնադրամի ղեկավար Կիրիլ Դմիտրիևը, առավելագույն օգուտ քաղելու համար «ամենաբարյացակամ և նույնիսկ փոքր-ինչ հաճոյախոսական վերաբերմունք ցուցաբերել ամերիկացի գործընկերների և անձամբ նախագահ Դոնալդ Թրամփի նկատմամբ»:

Պուտինը ցանկանում է ապահովել Ուկրաինայի չեզոք կարգավիճակը, Կիևում իշխանափոխությունը, ուկրաինական բանակի կրճատումը և Ղրիմի և չորս օկուպացված շրջանների բռնակցման ճանաչումը։

4,5 ժամ տևած բանակցություններից հետո Ռուսաստանն ու ԱՄՆ-ը պայմանավորվել են վերականգնել իրենց դեսպանատների անձնակազմը, որոնց աշխատանքը դե ֆակտո կաթվածահար է եղել դիվանագետների զանգվածային արտաքսման պատճառով։

Բանակցությունների առանցքային կետը՝ Պուտինի և Դոնալդ Թրամփի միջև հանդիպման կազմապերպումը, այնուամենայնիվ, մնացել է չլուծված։ Թեև ամերիկյան կողմն առաջարկել է գագաթնաժողովն անցկացնել փետրվարին, սակայն դա «դժվար թե» տեղի ունենա, հանդիպման արդյունքներով ասել է Ուշակովը։ Նա հավելել է, որ դեռ վաղ է խոսել Ռուսաստանի և ԱՄՆ-ի դիրքորոշումների մերձեցման մասին։

Թարգմանությունը՝ Տաթև Ֆռանգյանի