Քաղաքականություն
19.02.2025 | 17:10
Իսրայելի արտաքին գործերի նախարար Գիդեոն Սաարը Թուրքիային մեղադրել է Իրանի հետ համագործակցելու մեջ՝ լիբանանյան «Հըզբոլլահ»-ին միջոցներ տրամադրելու համար՝ օգնելով զինյալների խմբավորմանը վերակազմավորվել այն բանից հետո, երբ այն կորցրել է առանցքային դաշնակցին Սիրիայում Բաշար Ասադի տապալումից հետո, գրում է Turkish Minute-ը։
«Իրանի ջանքերն ավելացել են՝ մաքսանենգ ճանապարհով գումարներ տեղափոխել Լիբանան «Հըզբոլլահ»-ի համար, որպեսզի վերականգնի իր իշխանությունն ու կարգավիճակը, այդ թվում՝ Թուրքիայի միջոցով և նրա հետ համագործակցելով»,- ասել է Սաարը ԱՄՆ սենատորների և Մերձավոր Արևելքի հարցերով ԱՄՆ հատուկ ներկայացուցչի տեղակալ Մորգան Օրթագուսի հետ հանդիպման ժամանակ:
Մեղադրանքները ստիպել են Լիբանանին անցյալ շաբաթ դադարեցնել թռիչքները Իրանի և Բեյրութի միջև, ինչը հարուցել է խմբավորման արձագանքը: «Հըզբոլլահ»-ը պահանջել է Լիբանանի կառավարությունից հրաժարվել Բեյրութի օդանավակայանում իրանական ինքնաթիռների վայրէջքն արգելելու մասին որոշումից։
Թեհրանը հերքել է, որ օգտագործել է կոմերցիոն թռիչքներ «Հըզբոլլահ»-ին կանխիկ գումար փոխանցելու համար, սակայն Լիբանանը երկուշաբթի երկարաձգել է թռիչքների արգելքը:
Սաարը նաև զգուշացրել է, որ Իրանն արագացնում է իր միջուկային ծրագիրը՝ ի պատասխան տարածաշրջանային վերջին անհաջողությունների:
Վկայակոչելով եվրոպացի բարձրաստիճան դիվանագետին՝ սաուդյան «Ալ-Հադաթ» լրատվականը հաղորդել է, որ Իսրայելը պատրաստ է հարված հասցնել Իրանին, եթե Թեհրանի և Վաշինգտոնի միջև բանակցությունները չհանգեցնեն համաձայնության ձեռքբերմանը։
Թարգմանությունը՝ Էմմա Չոբանյանի
