ԵՄ-ն հավանություն է տվել ռուսական ալյումինի, բանկերի և «ստվերային» նավատորմի դեմ նոր պատժամիջոցներին

ԵՄ երկրների մշտական ներկայացուցիչները հաստատել են Ռուսաստանի դեմ պատժամիջոցների 16-րդ փաթեթը։ Նոր սահմանափակումները կանդրադառնան ռուսական ալյումինի, 13 բանկերի ու ևս 73 լցանավերի «ստվերային» նավատորմի վրա, որոնք Կրեմլը հավաքել է նավթ տեղափոխելու համար՝ շրջանցելով արևմտյան պատժամիջոցների, գրում է Financial Times-ը՝ հղում անելով իրավիճակին ծանոթ աղբյուրներին։

ԵՄ երկրներն աստիճանական էմբարգո կսահմանեն ռուսական ալյումինե արտադրանքի որոշ տեսակների նկատմամբ, ինչպես նաև կընդլայնեն անձնական պատժամիջոցների «սև ցուցակները»՝ մուտքի արգելքներով և ակտիվների սառեցմամբ, ասել են FT-ի աղբյուրները:

Բացի այդ, փաթեթը կներառի երկրորդային միջոցներ այն ընկերությունների դեմ, որոնք, եվրոպական իշխանությունների կարծիքով, օգնում են Կրեմլին Ուկրաինայի դեմ պատերազմում: Ավելի կոշտ պատժամիջոցները միաձայն հավանության են արժանացել ԵՄ բոլոր 27 երկրների ներկայացուցիչների կողմից, նշել են FT աղբյուրները։ Այժմ դրանք պետք է վերջնական տեսքի բերվեն ԵՄ ղեկավարների կողմից:

Առնվազն 10 բանկ կանջատվի SWIFT համակարգից։ Բացի այդ, ԵՄ-ն «սև ցուցակում» կներառի ռուսական մի քանի օդանավակայաններ և նավահանգիստներ, որոնք օգտագործվում են պատժամիջոցները շրջանցելու համար:

«Մենք շարունակում ենք աջակցել Ուկրաինային և շարունակում ենք պատժամիջոցներ կիրառել ագրեսոր Ռուսաստանի դեմ, քանի որ դա ճիշտ է անել միջազգային կանոններն ու կարգը պահպանելու, ինքնիշխանությունն ու տարածքային ամբողջականությունը պաշտպանելու համար»,- FT-ին ասել է մի դիվանագետ, որը ներգրավված է պատժամիջոցների մշակման գործընթացում:

Այնուամենայնիվ, նա խոստովանել է, որ ԵՄ-ն մտահոգված է՝ ինչպես «շարունակել տնտեսական ճնշումը Ռուսաստանի վրա», եթե ԱՄՆ-ը հրաժարվի իր պատժամիջոցների քաղաքականությունից: Նախօրեին Սաուդյան Արաբիայում ռուսական պատվիրակության հետ բանակցություններից հետո պետքարտուղար Մարկ Ռուբիոն հայտարարել է, որ Արևմուտքն ինչ-որ պահի «ստիպված կլինի» հրաժարվել պատժամիջոցներից։

Թարգմանությունը՝ Տաթև Ֆռանգյանի