Մեծ Բրիտանիան կարող է պարեկություն իրականացնել Ուկրաինայի երկնքում պատերազմի ավարտից հետո

Մեծ Բրիտանիան կարող է Typhoon կործանիչներ տեղակայել Ուկրաինայի երկինքը պարեկելու համար, երբ պատերազմն ավարտվի և խաղաղություն հաստատվի, The Times-ին հայտնել են բրիտանական կառավարության և թագավորական ռազմաօդային ուժերի իրազեկ աղբյուրները:

Նրանց խոսքով՝ Լոնդոնում քննարկվում է ՆԱՏՕ-ի ծրագրի նմանությամբ Ուկրաինայի համար «օդային ոստիկանության» ստեղծման հարցը, համաձայն որի՝ դաշինքը պաշտպանում է Բալթյան երկրների օդային տարածքը 2004 թվականից։ Այս տարբերակն ավելի հավանական է թվում, քան երկրի երկնքում ոչ թռիչքային գոտու ստեղծումը, քանի որ վերջին դեպքում ինքնաթիռները պետք է շուրջօրյա պարեկություն կատարեն Ուկրաինայի երկնքում, պարզաբանել է թերթի աղբյուրներից մեկը։

Ենթադրվում է, որ «ոստիկանական առաքելությանը» կներգրավվեն «մինչև ատամները զինված» և միշտ թռիչքի պատրաստ տասնյակ կործանիչներ, որոնք նախատեսվում է տեղակայել Լեհաստանում։

Նման որոշումը կարող է դառնալ Ուկրաինայի անվտանգության երաշխիքների մի մասը, ինչպես նաև թույլ կտա զորքերի ավելի փոքր կոնտինգենտին տեղում վերահսկել խաղաղության համաձայնագրերի կատարումը: Այս դեպքում Մեծ Բրիտանիան ստիպված կլինի օգտագործել զգալի քանակությամբ ինքնաթիռներ և հակաօդային պաշտպանության համակարգեր։

Քննարկումները վաղ փուլում են, սակայն Թագավորական ռազմաօդային ուժերի աղբյուրը պարբերականին ասել է. «Մենք պատրաստ ենք անել այն, ինչ մեզ ասեն»։

Ավելի վաղ Ուկրաինայի նախագահ Վլադիմիր Զելենսկին հայտարարել էր, որ երկրին անհրաժեշտ են 100 հազար եվրոպացի խաղաղապահներ, որոնք կարող են կանխել Ռուսաստանի կրկնվող ագրեսիան ռազմական հակամարտության ավարտից հետո։

Թարգմանությունը՝ Տաթև Ֆռանգյանի