10.08.2026 | 13:40
Կանանց NBA-ում 3 միավորանոց նետումների ռեկորդ է գրանցվել. ՏԵՍԱՆՅՈՒԹ
Օվերչուկը Կասպյան հնգյակին առաջարկել է մտածել ԵՏՄ-ի հետ մերձեցման մասին
Քաղաքականություն
18.02.2025 | 20:13
ՌԴ փոխվարչապետ Ալեքսեյ Օվերչուկը Կասպյան հնգյակին առաջարկել է դիտարկել ԵՏՄ-ի հետ մերձեցման առավելությունները, գրում են ադրբեջանական լրատվամիջոցները։
«Տարածաշրջանում տնտեսական կապերի ամրապնդմանը նպաստում է ԵՏՄ-ին որպես դիտորդ երկրի՝ Իրանի անդամակցությունը։ Ես հրավիրում եմ Կասպյան հնգյակի մյուս անդամներին մտածել ԵՏՄ-ի հետ մերձեցման օգուտների մասին»,- ասել է Օվերչուկը՝ ելույթ ունենալով Թեհրանում Կասպյան երրորդ տնտեսական համաժողովում։
Ելույթի ընթացքում նա նաև ասել է, որ Ռուսաստանն ու Իրանը գրեթե ամբողջությամբ անցել են ազգային արժույթներով հաշվարկների։ Իրանի հետ առևտրատնտեսական համագործակցության զարգացման ամենահեռանկարային ոլորտներն են էներգետիկան, ավտոմոբիլային և ավիաշինությունը, նավաշինությունը, դեղագործությունը և տրանսպորտային ենթակառուցվածքները:
ԵՏՄ-ում ազգային արժույթների տեսակարար կշիռը փոխադարձ հաշվարկներում կազմում է ավելի քան 92 տոկոս։
Հավելենք, որ Կասպյան հնգյակում ընդգրկված են Ռուսաստանը, Ադրբեջանը, Իրանը, Ղազախստանը և Թուրքմենստանը։ Այս երկրների փոխվարչապետները մասնակցել են Թեհրանում Կասպյան երրորդ տնտեսական համաժողովին։
ԵՏՄ անդամ երկրներն են Հայաստանը, Բելառուսը, Ղազախստանը, Ղրղզստանը և Ռուսաստանը։
Թարգմանությունը՝ Էմմա Չոբանյանի
