09.10.2026 | 15:35
Երևանում սպասվում են կարճատև անձրևներ
Անկարայում ընթանում են Էրդողան-Զելենսկի բանակցությունները
Քաղաքականություն
18.02.2025 | 16:48
Անկարայում մեկնարկել են Թուրքիայի նախագահ Ռեջեփ Թայիփ Էրդողանի և Ուկրաինայի նախագահ Վլադիմիր Զելենսկիի բանակցությունները, հաղորդում է TRT Haber-ը։
Էրդողանը նախագահական համալիրում պաշտոնական արարողությամբ դիմավորել է Ուկրաինայի նախագահ Զելենսկիին, որից հետո սկսվել է հանդիպումը։ Մամուլի համար ձևաչափով փակ բանակցություններին ներկա են Թուրքիայի արտաքին գործերի նախարար Հաքան Ֆիդանը, ազգային պաշտպանության նախարար Յաշար Գյուլերը, նախագահի հաղորդակցության տնօրեն Ֆահրեթթին Ալթունը և արտաքին քաղաքականության և անվտանգության հարցերով նախագահի գլխավոր խորհրդական Աքիֆ Չաղաթայ Քըլըչը։
Էրդողանը և Զելենսկին կգլխավորեն նաև պատվիրակությունների հանդիպումն աշխատանքային ընթրիքի շրջանակում։
Նշվում է, որ հանդիպումների ընթացքում կվերանայվեն Թուրքիա-Ուկրաինա ռազմավարական գործընկերության հարաբերություններն իրենց բոլոր հարթություններում։ Կքննարկվեն երկու երկրների միջև համագործակցության հետագա ամրապնդմանն ուղղված քայլերը։ Մտքերի փոխանակում կլինի նաև Ուկրաինայի վերջին զարգացումների և տարածաշրջանային ու գլոբալ այլ խնդիրների շուրջ։
Բանակցությունների ավարտից հետո կստորագրվեն պայմանագրեր տարբեր ոլորտներում։
Էրդողանը և Զելենսկին համատեղ մամուլի ասուլիսով կամփոփեն Ուկրաինայի նախագահի այցը Թուրքիա։
Թարգմանությունը՝ Էմմա Չոբանյանի
