Սևանից բաց թողնված ջուրը նպատակին չի հասնում. Ռուբեն Հայթյան. ՏԵՍԱՆՅՈՒԹ

Հայաստանում, այո՛, կա ջրի մաֆիա, Սևանից բաց թողնված ջուրը նպատակին չի հասնում: Այս մասին այսօր՝ սեպտեմբերի 27-ին, հրավիրված ասուլիսում հայտարարեց «Սպառողների ազգային ասոցիացիայի» փոխնախագահ Ռուբեն Հայթյանը:

Նրա խոսքով՝ շուկայական տնտեսության պայմաններում գների ելևէջը նորմալ երևույթ է: Պարզապես որոշ դեպքերում գնաճի հիմնավորումներն այնքան էլ համոզիչ չեն: «Կոնկրետ լոլիկի մասին, որ ներկայացնում են ջրի սակավությունը, պարզապես իմ կարծիքն է, որ Սևանից 40 մլն լրացուցիչ ջուր է բաց թողնվում, ո՞ւր է գնում այդ ջուրը: Եթե ձկնաբուծարաններին են տալիս, ձկան գինն էլ չի իջնում»,- նշեց Հայթյանը:

Նա կարծում է, որ Հայաստանում, այո՛, ջրի մաֆիա կա. «Բաց թողնված ջուրը նպատակին չի հասնում, պետք է հետևել: Միայն ասում են՝ ջրի կորուստներ կան, բայց չեն բացահայտում: Նման բան չի լինում, որ կորուստը կա, բայց չի արձանագրվում, թե ինչն է պատճառը»: «Սպառողների ազգային ասոցիացիայի» նախագահ Մելիտա Հակոբյանի խոսքով էլ՝ գյուղացիների հետ խոսել են, ասել են՝ թե արևն այրել է ամբողջ բերքը: Սակայն, ըստ նրա, ամեն տարի արևն էլ կա, սակավաջրությունն էլ կա, լավ ջուրն էլ. «Բայց ամեն տարի գյուղացիները մի պատճառ բռնում են ու թանկացնում բերքը»:

Ասոցիացիան նաև կարագի, թթվասերի, կաթնաշոռի թանկացումներ է արձանագրել: «Կաթնամթերքի շուկայում մեղմ ձևով, աննկատ թանկացրեցին: Օրինակ՝ կաթնաշոռը. եթե մի քանի ամիս առաջ 460 դրամ էր, հիմա՝ 500-530 դրամ: Ես չգիտեմ՝ մեր Տնտեսական մրցակցության պաշտպանության հանձնաժողովն ի՞նչ է անում»,- ասաց Մելիտա Հակոբյանը՝ հավելելով, որ որոշ ապրանքների գներ էլ նվազել են, օրինակ՝ շաքարավազի:

Մանրամասները՝ տեսանյութում: