08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
ՆԱՏՕ-ն Կիևին մեղադրել է զենքերը վատնելու մեջ․ The Telegraph
Քաղաքականություն
17.02.2025 | 18:10
Հյուսիսատլանտյան դաշինքի ներկայացուցիչներն իրենց բողոքն են հայտնել Ուկրաինային՝ մեղադրելով երկրի Զինված ուժերին ՆԱՏՕ-ի երկրների կողմից տրամադրված զենքի և տեխնիկայի անարդյունավետ օգտագործման մեջ։ Այս մասին գրել է բրիտանական The Telegraph-ը՝ վկայակոչելով Բրիտանիայի ՊՆ-ում իր աղբյուրներին։
«Ենթադրվում է, որ Կիևի ուժերը համատեղում են Արևմուտքի կողմից մատակարարվող զենքերը խորհրդային ոճի մարտավարության հետ, ինչը հանգեցրել է զգալի քանակությամբ ՆԱՏՕ-ի տեխնիկայի կորստի»,- գրում է պարբերականը՝ հավելելով, որ նման մարտավարությունն «առաջնահերթություն է տալիս զանգվածային, էժան կրակային հզորությանը, քան ՆԱՏՕ-ի ոճով ճշգրիտ հարձակումներին», ինչի արդյունքում թանկարժեք զենքերը «վատնվում են»։
Բրիտանացի զինվորականներից մեկը նշել է, որ NLAW համակարգերը, որոնք նախատեսված են զրահատեխնիկային դիպուկ հարվածներ հասցնելու համար, օգտագործվում են այնպես, «կարծես դրանք էժան ռուսական ձեռքի հակատանկային նռնականետեր են»: Նրա խոսքով՝ ուկրաինացի զինվորականները կարող են միաժամանակ հինգից վեց NLAW հրթիռներ արձակել ռուսական դիրքերի ուղղությամբ, իսկ նման հարվածի շարքի արժեքը կազմում է ավելի քան 100 հազար ֆունտ սթերլինգ (ավելի քան 120 հազար եվրո):
The Telegraph-ը մանրամասնում է, որ NLAW մեկանգամյա օգտագործման հակատանկային հրթիռը նախատեսված է հակառակորդի զրահատեխնիկայի վրա ճշգրիտ հարձակումների համար։ Բրիտանիան Ուկրաինային մատակարարել է ավելի քան 5000 նման հրթիռ, ինչպես նաև հարյուրավոր բարձր ճշգրտության Brimstone հակատանկային հրթիռներ, որոնք նախատեսված են գետնից կամ օդից հարձակվելու համար։
Թարգմանությունը՝ Տաթև Ֆռանգյանի
