25.04.2025 | 14:23
Փոխհրաձգություն Հնդկաստանի և Պակիստանի սահմանին․ Իսլամաբադը զգուշացնում է «լայնածավալ պատերազմի» մասին
Թրամփը ցանկանում է Ուկրաինայում զինադադարի հասնել մինչև Զատիկ․ Bloomberg
Քաղաքականություն
17.02.2025 | 12:27
Սպիտակ տունը եվրոպացի պաշտոնյաներին տեղեկացրել է մինչև 2025 թվականի Սուրբ Հարության տոնը (Սուրբ Զատիկ) Ուկրաինայում զինադադարի հասնելու մտադրության մասին։ Այս մասին հայտնում է Bloomberg-ը՝ վկայակոչելով իր աղբյուրներին։ Նշվում է, որ այս տարի և՛ կաթոլիկները, և՛ ուղղափառները Զատիկը տոնելու են ապրիլի 20-ին:
Արևմտյան որոշ պաշտոնյաներ կարծում են, որ ծրագիրը չափազանց հավակնոտ և անհավանական է, չնայած առաջիկա օրերին Սաուդյան Արաբիայում ԱՄՆ-ի և Ռուսաստանի պաշտոնյաների միջև նախատեսված խորհրդակցություններին:
Այս հանդիպումներն ուղղված են նախագահներ Թրամփի և Պուտինի հնարավոր բանակցություններին նախապատրաստվելուն։ Bloomberg-ի աղբյուրներից մեկը նշում է, որ զինադադարի կնքման ավելի իրատեսական ժամկետ կարող է լինել 2025 թվականի վերջը։
Առաջիկա բանակցությունների ֆոնին եվրոպական երկրները մշակում են Ուկրաինային ռազմական օգնության նոր լայնածավալ փաթեթ։
Ծրագրի մանրամասները չեն հրապարակվի մինչև 2025 թվականի փետրվարի 23-ը, հաղորդում է Bloomberg-ը։ Այդ ժամանակ Գերմանիայում արդեն տեղի կունենան արտահերթ խորհրդարանական ընտրություններ։ Դա քաղաքական գործիչներին թույլ կտա խուսափել վեճերից մինչև քվեարկությունը։
Հունվարի վերջին ուկրաինական Strana.ua-ն հրապարակել է ԱՄՆ նախագահ Դոնալդ Թրամփի՝ ռուս-ուկրաինական պատերազմին վերջ տալու 100-օրյա ենթադրյալ ծրագիրը։ Չհաստատված տեղեկությունների համաձայն՝ հրադադարը կարող է հայտարարվել ապրիլի 20-ին, իսկ մինչև մայիսի 9-ն ակնկալվում է նախապատրաստել խաղաղության համաժողովի հռչակագիրը։
Ուկրաինայի ազգային անվտանգության և պաշտպանության խորհուրդը հայտարարել է, որ պատերազմի ավարտի և բանակցությունների մեկնարկի կոնկրետ ժամկետների մասին ԶԼՄ-ներում հրապարակված տեղեկատվությունը չի համապատասխանում իրականությանը։
Թարգմանությունը՝ Տաթև Ֆռանգյանի
