«ԱՄՆ-ի օգնությամբ մենք կավարտենք Իրանի դեմ գործը». Նեթանյահու

Իսրայելը և Միացյալ Նահանգները մտադիր են դիմակայել Իրանի միջուկային հավակնություններին և նրա «ագրեսիային» Մերձավոր Արևելքում, հայտարարել է Իսրայելի վարչապետ Բենիամին Նեթանյահուն՝ պաշտոնը ստանձնելուց հետո առաջին անգամ Իսրայել այցելած ԱՄՆ պետքարտուղար Մարկո Ռուբիոյի հետ հանդիպումից հետո։ Նեթանյահուն ասել է, որ Ռուբիոյի հետ քննարկել է մի շարք հարցեր, «որոնցից ոչ մեկն ավելի կարևոր չէ, քան Իրանը», փոխանցում է Sky news-ը:

«Մենք պայմանավորվեցինք, որ այաթոլլահները չպետք է ունենան միջուկային զենք, որ Իրանի ագրեսիան տարածաշրջանում պետք է զսպվի»,- Reuters-ի փոխանցմամբ՝ ասել է Իսրայելի վարչապետը։

Իր հերթին, ԱՄՆ պետքարտուղն ընդգծել է, որ Իրանը կանգնած է «ամեն ահաբեկչական խմբավորման թիկունքում» Մերձավոր Արևելքում, «այն ամենի հետևում, որը սպառնում է խաղաղությանը և կայունությանը միլիոնավոր մարդկանց համար, ովքեր այս տարածաշրջանն իրենց տունն են անվանում»։

Նեթանյահուն վստահեցրել է, որ Իսրայելը «կավարտի գործը» Իրանի դեմ «նախագահ Թրամփի ուժեղ ղեկավարության ներքո»։

Խոսելով Սիրիայում տիրող իրավիճակի մասին՝ ԱՄՆ պետքարտուղարը «խոստումնալից» է անվանել Բաշար Ասադի ռեժիմի տապալումը, միաժամանակ, ընդգծել, որ «ապակայունացնող մի ուժի փոխարինումը մյուսով դրական զարգացում չէ»։

«Սա մի բան է, որին մենք շատ ուշադիր հետևելու ենք»,- ասել է Ռուբիոն:

Իր հերթին, Նեթանյահուն նշել է, որ թույլ չի տա «այլ թշնամական ուժերին», նկատի ունենալով, առաջին հերթին, Իրանին, օգտագործել Սիրիան որպես «Իսրայելի դեմ գործողությունների բազա»։ Նա հիշեցրել է, որ Իսրայելի պաշտպանության բանակը «հարյուրավոր հարվածներ» է հասցրել Սիրիայում թիրախներին։

Թարգմանությունը՝ Տաթև Ֆռանգյանի