Ռուսաստանը հաջորդ տարի կարող է հարձակվել ՆԱՏՕ-ի անդամ երկրների վրա․ Զելենսկի

Ուկրաինայի նախագահը հանդես է եկել կտրուկ նախազգուշացմամբ՝ հայտարարելով, որ Ռուսաստանը կարող է ագրեսիայի ակտ նախապատրաստել ՆԱՏՕ-ի անդամ երկրների դեմ հաջորդ տարի։ Ուրբաթ օրը ելույթ ունենալով Մյունխենի անվտանգության համաժողովում՝ Վլադիմիր Զելենսկին ասել է, որ հարձակումը կարող է լինել Բելառուսից․ գրում է euronews-ի ռուսական ծառայությունը։

Զելենսկին ասել է, որ Կիևը «հստակ հասկանում է, թե ինչ են պատրաստվում անել ռուսները Բելառուսի հետ»։

«Ռուսաստանը 15 դիվիզիա է պատրաստում: Մոտ 100-150.000 զինծառայողներ պատրաստվում են իրավիճակի սրման Բելառուսի կողմից, – ասել է Զելենսկին:-Ես վստահ չեմ, որ նրանք կհարձակվեն հենց Ուկրաինայի վրա, բայց նրանք հաստատ կհարձակվեն: Գուցե Ուկրաինայի, գուցե Լեհաստանի, գուցե Բալթյան երկրների»:

Զելենսկին հավելել է, որ Եվրոպայում բոլորն անհանգստացած են, եվրոպացիները շատ անհանգստացած են, վախենում են, որ կմնան առանց ԱՄՆ-ի աջակցության։

«Մենք արդեն տեսնում ենք, որ Եվրոպան է՛լ ավելի կամրապնդի Ուկրաինայի շուրջ համախմբվածությունը, քանի որ դա նրանց պաշտպանությունն է: Նրանք ավելի ու ավելի են հասկանում, որ հաջորդն իրենք են: Ու ոչ թե հեռավոր ապագայում, այլ հենց հաջորդը»,- հայտարարել է Զելենսկին:

Հիշեցնենք, որ օրերս Դանիայի պաշտպանության հետախուզական ծառայությունը հանդես էր եկել նմանատիպ նախազգուշացմամբ՝ ասելով, որ Ռուսաստանը կարող է հինգ տարվա ընթացքում լայնամասշտաբ պատերազմ սկսել Եվրոպայում, եթե Մոսկվան «ՆԱՏՕ-ն ընկալի որպես ռազմական առումով թուլացած կամ քաղաքականապես բաժանված»։