ՌԴ-ն մի ամբողջ ինքնաթիռ գումար է ուղարկել Սիրիա․ Reuters

Ռուսաստանից Դամասկոսի օդանավակայան է ժամանել հարյուր միլիարդավոր սիրիական ֆունտով բռնված ինքնաթիռ, որոնք տպվել են երկրի պաշտոնանկ արված նախագահ Բաշար Ասադի կառավարման ժամանակաշրջանում, գրում է Reuters-ը՝ հղում կատարելով իր իրազեկ աղբյուրներին։

Նշվում է, որ այդ գումարը հավասարազոր է տասնյակ միլիոնավոր ԱՄՆ դոլարի։ Գործակալության զրուցակիցների տվյալների համաձայն՝ ՌԴ-ն չի հասցրել այս գումարներն ուղարկել Սիրիա Ասադին տապալումից առաջ։

Սիրիայի նոր իշխանությունները Ռուսաստանից պահանջել են դադարեցնել արժույթի թողարկումն այն բանից հետո, երբ Ասադը փախել է Մոսկվա։ Reuters-ի աղբյուրները, սակայն, չեն հստակեցրել, թե կոնկրետ ինչն է դրդել Ռուսաստանին տպագիր կանխիկ գումարը հասցնել Սիրիա։

Իշխանափոխությունից ի վեր Սիրիան բախվել է իրացվելիության պակասի, և հունվարին Սիրիայի Կենտրոնական բանկի նոր ղեկավար Մայսա Սաբրինն հայտարարել է, որ ցանկանում է դադարեցնել սիրիական ֆունտի տպագրությունը՝ կանգնեցնելու գնաճը:

Սիրիական ֆունտը սև շուկայում ամրապնդվել է նոր ղեկավարության իշխանության գալուց ի վեր, ինչին նպաստել է արտերկրից սիրիացիների հոսքը և արտարժույթի առևտրի խիստ վերահսկողության վերացումը, հայտնում է Reuters-ը։ Այսպես, ըստ ֆոնդային բորսայի տվյալների, հինգշաբթի այն վաճառվում էր 1 դոլարի դիմաց 9850 ֆունտ ստերլինգ փոխարժեքով։

Պաշտոնական փոխարժեքը, ըստ Կենտրոնական բանկի, կազմել է շուրջ 13000 ֆունտ 1 դոլարի դիմաց, երբ ուրբաթ օրը բորսաները փակվել են:

Reuters-ի աղբյուրներն ուղղակիորեն չեն նշել Ռուսաստանից կանխիկ գումար ուղարկելու պատճառը, սակայն դա կարող է լինել Կրեմլի կողմից սիրիական նոր ռեժիմին ֆինանսական օգնություն տրամադրելու փորձ՝ երկրում իր ռազմաբազաները պահպանելու համար։ Հիշեցնենք՝  փետրվարի 12-ին Ռուսաստանի նախագահ Վլադիմիր Պուտինն առաջին անգամ հեռախոսազրույց է ունեցել Սիրիայի դե ֆակտո առաջնորդ Ահմեդ ալ-Շարաայի հետ։

Թարգմանությունը՝ Տաթև Ֆռանգյանի