09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
ԱՄՆ-ը կմեծացնի Հնդկաստանին զենքի վաճառքը․ երկրները ցանկանում են երկկողմ առևտուրը հասցնել 500 մլրդ դոլարի
Քաղաքականություն
14.02.2025 | 15:52
ԱՄՆ-ը և Հնդկաստանը ցանկանում են կրկնապատկել երկկողմ առևտուրը՝ մինչև 2030 թվականը հասցնելով 500 միլիարդ դոլարի: Այս մասին Վաշինգտոնում ԱՄՆ նախագահ Դոնալդ Թրամփի հետ համատեղ մամուլի ասուլիսում հայտարարել է Հնդկաստանի վարչապետ Նարենդրա Մոդին, գրում DW-ի ռուսական ծառայությունը։
Reuters-ը նշում է, որ համագործակցությունն առաջին հերթին ուղղված կլինի արհեստական բանականությանն ու կիսահաղորդիչներին, ինչպես նաև ռազմավարական օգտակար հանածոների մատակարարման ամուր շղթաների ստեղծմանը։
Թրամփն էլ նշել է, որ Հնդկաստանը պատրաստ է նվազեցնել ամերիկյան ապրանքների մաքսատուրքերը։ Բացի այդ, Դելին ներկրելու է ավելի շատ ամերիկյան նավթ և գազ՝ երկրների միջև առևտրային դեֆիցիտը նվազեցնելու համար։
Վաշինգտոնն իր հերթին պատրաստվում է մեծացնել Հնդկաստանին զենքի վաճառքը։
«Մենք կավելացնենք մեր ռազմական տեխնիկայի վաճառքը Հնդկաստանին միլիարդավոր դոլարներով: Մենք նաև հող ենք նախապատրաստում Հնդկաստանին F-35 կործանիչներ վաճառելու համար»,- խոստացել է Թրամփը։
Նա, սակայն, հստակ ժամկետներ չի նշել։ Նման գործարքների վերջնական ավարտը սովորաբար տարիներ է պահանջվում։
Տասնամյակներ շարունակ Ռուսաստանն էր Հնդկաստանի զենքի հիմնական մատակարարը։ Ռազմատեխնիկական համագործակցության դաշնային ծառայության ղեկավարի տեղակալ Միխայիլ Բաբիչն ավելի վաղ հայտնել էր, որ Ռուսաստանը պատրաստ է հնդկական կողմի հետ համատեղ արտադրել ռուսական հինգերորդ սերնդի Սու-57 կործանիչներ։
Թարգմանությունը՝ Էմմա Չոբանյանի
