20.12.2025 | 20:00
100,000 ռուբլի՝ ՀՀ-ում լրտեսության համար․ ՌԴ քաղաքացիները Հայաստանում տվյալներ են հավաքել․ ՏԵՍԱՆՅՈՒԹ
ԱՄՆ-ից սահմանային անվտանգության խումբ դեռ չի ժամանել․ Միրզոյան-Բլինքեն ստորագրությունից 1 ամիս անց. ՏԵՍԱՆՅՈՒԹ
Քաղաքականություն
14.02.2025 | 20:00
Այսօր լրացավ Երևանի և Վաշինգտոնի միջև ռազմավարական համագործակցության կանոնադրության ստորագրման մեկ ամիսը։ Հայաստանն ու Միացյալ Նահանգները արտգործնախարար Արարատ Միրզոյանը և այդ պահին պետքարտուղար Էնթոնի Բլինքենի մասնակցությամբ ստորագրած փաստաթղթով պարտավորվեցին խորացնել հարաբարությունները ժողովրդավարության և տնտեսական ազատության առաջխաղացման, ինքնիշխանության և տարածքային ամբողջականության պաշտպանության, օրենքի գերակայության ու մարդու իրավունքների և հիմնարար ազատությունների հարգման, ինչպես նաև էներգետիկ անվտանգության ամրապնդման ոլորտներում:
«Հաջորդ ամիս՝ առաջիկա շաբաթներին, մեր Մաքսային և սահմանային պահպանության թիմը կմեկնի Հայաստան՝ աշխատելու հայ գործընկերների հետ սահմանային անվտանգության կարողությունների զարգացման ուղղությամբ»,- նշել էր ԱՄՆ պետքարտուղարը։
Չնայած Բլինքենի այս հայտարարությանը՝ չորս շաբաթ անց Հայաստանի ԱԳՆ-ից Factor TV-ին փոխանցում են, որ այցի վերաբերյալ հստակ ժամկետներ չկան։
Ռազմավարական համագործակցության կանոնադրության 3-րդ բաժնում ներառված են պաշտպանության և անվտանգության ոլորտում համագործակցության առաջնահերթությունները, իսկ երրորդ կետում, մասնավորապես, նշված է․ «Հաշվի առնելով զանգվածային ոչնչացման զենքի տարածման վտանգը՝ Հայաստանը և Միացյալ Նահանգները նախատեսում են ուսումնասիրել զանգվածային ոչնչացման զենքի և վտանգավոր տեխնոլոգիաների տարածման դեմ պայքարի միջոցները՝ միջազգային չտարածման չափանիշներին համապատասխանելու, արտահանման վերահսկողության արդյունավետ կիրառման և վերահսկողության ամրապնդման միջոցով: Այդ նպատակով Միացյալ Նահանգները մտադիր է աջակցել Հայաստանի սահմանապահ զորքերի և Պետական եկամուտների կոմիտեի կարողությունների զարգացմանը»։
ՀՀ ԱԳՆ խոսնակ Անի Բադալյանը Factor TV-ի հետ զրույցում, միաժամանակ, շեշտում է, որ Հայաստանն ԱՄՆ-ի հետ համագործակցում է նաև թմրամիջոցների դեմ պայքարի և իրավապահ մարմինների միջև փոխգործակցության ընդլայնման ուղղությամբ, այդ թվում՝ Հայաստանի իրավապահ մարմինների կարողությունների և հմտությունների զարգացմանն աջակցության միջոցով, պարբերաբար կազմակերպելով դասընթացներ՝ նվիրված կոռուպցիայի, թմրամիջոցների ապօրինի շրջանառության, ինչպես նաև թրաֆիքինգի դեմ պայքարին:
ԱԺ «Հայաստան» խմբակցության պատգամավոր Քրիստինե Վարդանյանը մասնագիտական խմբի այցի հետ կապված անորոշությունը հիմնավորում է այն հանգամանքով, որ Բայդենի վարչակազմի օրոք ստորագրված փաստաթուղթը կարող է և համաձայնեցված չլինեն Թրամփի վարչակազմի հետ։
Նիկոլ Փաշինյանը խորհրդարանում պատգամավորների հետ հարցուպատասխանի ընթացքում իր հիմնավորումն էր ներկայացրել՝ նշելով, որ Բայդենի օրոք ստորագրված փաստաթուղթը կենսունակ է նաև Թրամփի կառավարման շրջանում։
Factor TV-ին ԱԳՆ մեկ այլ պաշտոնյա էլ փոխանցել է, որ Բլինքենի մատնանշած մասնագիտական խմբի այցը, եթե տեղի ունենա, ենթադրում է աշխատանքային քննարկում՝ թրեյնինգի ձևաչափով, ոչ ավելին։
Մանրամասները՝ տեսանյութում։
Նարեկ Կիրակոսյան
