17.07.2026 | 22:13
Բուհերի ընդունելության արդյունքները կհրապարակվեն հուլիսի 18-ին
Մինչև Զատիկ կամ մայիսի 9-ը․ երբ կկնքվի ՌԴ-ի և Ուկրաինայի միջև հրադադարի պայմանագիրը․ FT
Քաղաքականություն
14.02.2025 | 13:10
Ուկրաինայի և արևմտյան բարձրաստիճան պաշտոնյաները բրիտանական Financial Times-ին ասել են, որ ԱՄՆ նախագահ Դոնալդ Թրամփը և Ռուսաստանի նախագահ Վլադիմիր Պուտինը կձգտեն ապրիլ-մայիս ամիսներին Ուկրաինայում հրադադարի հաստատմանը: FT-ի աղբյուրները կարծում են, որ Թրամփն ու Պուտինը «կփորձեն հրադադար ապահովել մինչև առաջիկա երկու կարևոր ամսաթվերը՝ Զատիկը, որը ուղղափառ և կաթոլիկ եկեղեցիները կնշեն ապրիլի 20-ին կամ մայիսի 9-ին, երբ Ռուսաստանը կնշի Խորհրդային Միության հաղթանակը նացիստական Գերմանիայի նկատմամբ»:
«Պուտինը կցանկանա համաձայնագիր կնքել նման նշանակալի օր»,- ասել է ուկրաինացի պաշտոնյաներից մեկը։
Հունվարի 26-ին ուկրաինական Strana.ua պարբերականը հրապարակել է Դոնալդ Թրամփի «100-օրյա ծրագիրը»՝ վերջ դնելու ռուս-ուկրաինական պատերազմին։ Պլանի համաձայն, որի իսկությունը հաստատված չէ, ապրիլի 20-ին կարող է զինադադար հայտարարվել, իսկ մինչև մայիսի 9-ը նախատեսվում է խաղաղության համաժողովի կողմից պատրաստել պատերազմի ավարտի մասին հռչակագիրը։
Միաժամանակ, Ուկրաինայի ազգային անվտանգության և պաշտպանության խորհուրդը հայտարարել է, որ ԶԼՄ-ներում հայտնված «պատերազմի ավարտի և բանակցությունների մեկնարկի ժամկետների մասին» տեղեկատվությունը «ընդհանրապես չի համապատասխանում իրականությանը»։
Թարգմանությունը՝ Տաթև Ֆռանգյանի
