ԱՄՆ փոխնախագահը ՌԴ-ին պատժամիջոցներով և Ուկրաինայում զորքերի տեղակայմամբ է սպառնում, եթե Մոսկվայի հետ բանակցությունները ձախողվեն

ԱՄՆ-ը չի բացառում, որ կարող է պատժամիջոցներ կիրառել Ռուսաստանի դեմ կամ զորքեր ուղարկել Ուկրաինա, եթե Վլադիմիր Պուտինը չհամաձայնի խաղաղության պայմանագրին՝ երաշխավորելով Կիևի երկարաժամկետ անկախությունը։ The Wall Street Journal-ին տված հարցազրույցում այս մասին ասել է ԱՄՆ փոխնախագահ Ջեյ Դի Վենսը։

«Կան ճնշման տնտեսական լծակներ, կան, իհարկե, նաև ռազմական լծակներ։ Ուկրաինա ամերիկյան զորքեր ուղարկելու տարբերակը մնում է օրակարգում, եթե Մոսկվան հրաժարվի բանակցություններից,»,- ասել է Վենսը։

ԱՄՆ փոխնախագահի խոսքով՝ Ռուսաստանի հետ բանակցությունները կարող են հանգեցնել «գործարքի, որը շատերին շոկի կենթարկի»։ Միաժամանակ, նա նշել է, որ բանակցությունների ընթացքում Թրամփը կարող է փոխել իր կարծիքը որոշակի հարցերի շուրջ։ Նրա վարչակազմի նպատակն այժմ Պուտինին համոզելն է, որ նա կարող է ավելիին հասնել դիվանագիտական ճանապարհով, քան մարտի դաշտում։

Վենսը հավելել է, որ դեռ վաղ է ասել, թե Ուկրաինայի որ հատվածը կարող է մնալ Ռուսաստանի վերահսկողության տակ կամ անվտանգության ինչ երաշխիքներ կարող են առաջարկել ԱՄՆ-ը և արևմտյան այլ երկրներ Կիևին։ Այս մանրամասները, նրա խոսքով, պետք է մշակվեն խաղաղ բանակցությունների ընթացքում։

«Կան բազմաթիվ ձևակերպումներ և կոնֆիգուրացիաներ, բայց մենք մտահոգված ենք Ուկրաինայի ինքնիշխանությամբ և անկախությամբ»,- ասել է փոխնախագահը։

Վենսը նաև առաջարկել է վերականգնել հարաբերությունները Ռուսաստանի հետ՝ Ուկրաինայում խաղաղության հաջող գործարքից հետո: ԱՄՆ փոխնախագահի խոսքով՝ Մոսկվայի ներկայիս մեկուսացումն արևմտյան շուկաներից նրան դարձնում է «Պեկինի կրտսեր գործընկերը»։

Թարգմանությունը՝ Տաթև Ֆռանգյանի