10.08.2026 | 13:22
Բերման են ենթարկվել մի խումբ անձինք՝ իրենց մեքենաներով հանդերձ. նրանց մոտ հայտնաբերվել են զենքեր
Կիևը հերքում է Թրամփին․ Մյունխենում հանդիպում չի լինի ՌԴ-ի և Ուկրաինայի ներկայացուցիչների մասնակցությամբ
Քաղաքականություն
14.02.2025 | 11:39
Ուկրաինայի նախագահի խորհրդական Դմիտրի Լիտվինը, ուղղակիորեն չհիշատակելով ԱՄՆ նախագահ Դոնալդ Թրամփին, լրագրողների հետ զրույցում մեկնաբանել է Մյունխենում ռուսական պատվիրակության մասնակցությամբ հանդիպման հնարավորությունը, գրում է BBC-ի ռուսական ծառայությունը։
«Ուկրաինական դիրքորոշումն անփոփոխ է։ Ուկրաինան նախ պետք է խոսի Ամերիկայի հետ։ Եվրոպան պետք է ցանկացած լուրջ խոսակցության մասնակից լինի իրական ու տևական խաղաղության համար։ Իսկ ռուսների հետ քննարկման սեղանին պետք է դրվի միայն համաձայնեցված ընդհանուր դիրքորոշումը։ Դատարկ սեղանի շուրջ ռուսների հետ չեն հանդիպում, իսկ հիմա սեղանին ոչինչ չկա։ Մյունխենում ռուսների հետ զրույցի չի նախատեսվում»,- ասել է Լիտվինը։
Հավելենք, որ նախօրեին Դոնալդ Թրամփը հայտարարել էր, որ այսօր Մյունխենում տեղի է ունենալու հանդիպում Ռուսաստանը, Ուկրաինան և ԱՄՆ ներկայացնող «բարձր մակարդակի մարդկանց» հետ։
Պատասխանելով հարցին՝ արդյո՞ք Պուտինը կմասնակցի Սաուդյան Արաբիայում նախատեսված գագաթնաժողովին (նման գագաթնաժողովի մասին ավելի վաղ խոսել էր ինքը՝ ԱՄՆ նախագահը), Թրամփն ասել էր. «Ի վերջո՝ այո, հիմա՝ ոչ, դեռ վաղ է։ Նրանք վաղը հանդիպում կունենան Մյունխենում։ Այնտեղ Ռուսաստանը ներկայացված է լինելու մեր մարդկանց հետ։ Ի դեպ, հրավիրված է նաև Ուկրաինան։ Ես կոնկրետ չգիտեմ, թե որ երկրից ով կլինի։ Բայց բարձր մակարդակի մարդիկ՝ Ռուսաստանից, Ուկրաինայից և ԱՄՆ-ից»։
Թարգմանությունը՝ Էմմա Չոբանյանի
