13.03.2026 | 16:46
Այս պահին Ռուսաստանի առաջնության լավագույն ֆուտբոլիստը Սպերցյանն է․ Տրոշեչկին
Մակրոնը մերժել է Հունաստանի` Թուրքիային Meteor հրթիռների վաճառքն արգելափակելու դիմումը
Քաղաքականություն
13.02.2025 | 22:45
Ֆրանսիայի նախագահ Էմանուել Մակրոնը մերժել է Հունաստանի վարչապետ Կիրիակոս Միցոտակիսի դիմումը՝ արգելափակելու Թուրքիային Meteor հրթիռների վաճառքը, հաղորդում են հունական լրատվամիջոցները։
Նշվում է, որ Փարիզի AI-ի գագաթնաժողովում հանդիպման ժամանակ Մակրոնը հասկացրել է, որ Meteor-ի «օդ-օդ» հրթիռների վաճառքը կանխելն անիրագործելի է։ Նա նշել է, որ գործարքը ներառում է վեց երկրների եվրոպական MBDA կոնսորցիումը, որը ներառում է Մեծ Բրիտանիան, Գերմանիան, Ֆրանսիան, Իտալիան, Իսպանիան և Շվեդիան, ինչը նշանակում է, որ այն դուրս է Ֆրանսիայի լիարժեք վերահսկողությունից, հայտնում է EFSYN օրաթերթը։
Հաղորդվում է, որ Աթենքը ծրագրում է կապ հաստատել կոնսորցիումի մյուս անդամների հետ՝ փորձելով արգելափակել Անկարային հրթիռների վաճառքը:
Թուրքիան բանակցություններ է վարում մինչև 40 EF-2000 Eurofighter ինքնաթիռներ ձեռք բերելու շուրջ՝ իր օդուժն ուժեղացնելու համար: Նշվում է, որ Meteor հրթիռներն առաջարկվող Eurofighter-ի գործարքի մաս են կազմում:
Հունաստանը, որը վերջերս ավելացրել է իր ռազմական գնումներն այնպիսի ծրագրերի միջոցով, ինչպիսիք են F-16 նավատորմի արդիականացումը և ֆրանսիական արտադրության Rafale ինքնաթիռների գնումը, որոնք հագեցած են Meteor հրթիռներով, կտրականապես դեմ է Թուրքիային դրանք վաճառելուն:
Հունվարի 29-ին Հունաստանի պաշտպանության նախարար Նիկոս Դենդիասը կանչել էր Աթենքում Ֆրանսիայի դեսպանին և ռազմական կցորդին ու պաշտոնապես հայտնել, որ Հունաստանը դեմ է գործարքին։ Փետրվարի 4-ին էլ Միցոտակիսը Բրյուսելում ԵՄ գագաթնաժողովի շրջանակում կայացած հանդիպման ժամանակ կրկին պարզաբանումներ էր խնդրել Մակրոնից հրթիռի հետ կապված բանակցությունների վերաբերյալ։
Թուրքական աղբյուրները ավելի վաղ հայտնել էին, որ Թուրքիայի նախագահ Ռեջեփ Թայիփ Էրդողանը և Էմանուել Մակրոնն անցած ուրբաթ հեռախոսազրույցի ընթացքում քննարկել են երկկողմ հարաբերությունների և համագործակցության այլ հարցեր։
Թարգմանությունը՝ Էմմա Չոբանյանի
