Թուրքիան հայտարարել է անհրաժեշտության դեպքում Սիրիայում զորքեր տեղակայելու մասին

Թուրքիան կարող է իր զորքերը տեղափոխել Սիրիայի հյուսիս, եթե անհրաժեշտություն առաջանա: Այս մասին հայտնել են Թուրքիայի պաշտպանության նախարարության աղբյուրները՝ մատնանշելով երկրի նոր ղեկավարների հետ «ընդհանուր փոխըմբռնումը» ահաբեկչական խմբավորումների ոչնչացման հարցում, գրում է Daily Sabah-ը։

Այս հայտարարությունները հնչում են ԱՄՆ-ի կողմից աջակցվող YPG-ի՝ PKK-ի խմբավորման սիրիական թևի ճակատագրի շուրջ անորոշության ֆոնին, որն ուղղակի վտանգ է ներկայացնում Թուրքիայի համար և որին Անկարան անվանում է ահաբեկչական։ Աղբյուրները նշում են, որ Անկարան նաև աշխատում է Սիրիայում ռազմական կցորդ նշանակելու ուղղությամբ:

Դեկտեմբերին Բաշար Ասադի պաշտոնանկությունից հետո Թուրքիան հայտարարել է, որ կապի մեջ է Սիրիայի նոր կառավարիչների հետ՝ սիրիական բանակի պաշտպանական և անվտանգության կարողությունները բարձրացնելու համար:

«Սիրիայի նոր վարչակազմը պետք է ապահովի ամբողջ երկրի ամբողջական ինքնիշխանությունը։Որպես Թուրքիա՝ մենք շարունակում ենք աջակցել մեր սիրիացի եղբայրներին ու քույրերին։ Մեր առաջնահերթությունը Սիրիայում բոլոր ահաբեկչական խմբավորումների վերացումն է»,- լրագրողներին ասել են Թուրքիայի ՊՆ  աղբյուրները։

ՊՆ պաշտոնական ներկայացուցիչ Զեքի Աքթյուրքն էլ ասել է, որ «անցած շաբաթվա ընթացքում Իրաքի և Սիրիայի հյուսիսում ավիահարվածների հետևանքով սպանվել է PKK/YPG-ի 56 ահաբեկիչ»։

Նա ասել է, որ «գործողությունների արդյունքում տարածաշրջանում հունվարի 1-ից սպանված ահաբեկիչների թիվը հասել է 377-ի, որոնցից 134-ը սպանվել են Իրաքում, 243-ը՝ Սիրիայում»։

Թարգմանությունը՝ Էմմա Չոբանյանի