«Տաշիր» բարեգործական հիմնադրամի և այլ վարկային ծրագրի միջոցով արդիականացված Վանաձորի ԲԿ-ն նվիրաբերվեց Լոռու մարզպետարանին

Կառավարության սեպտեմբերի 27-ի նիստում չզեկուցվող հարցերից մեկով գործադիրը որոշեց ՀՀ Լոռու մարզի Վանաձոր համայնքի սեփականությունը հանդիսացող հողամասը որպես պետական սեփականություն ամրացնել Լոռու մարզպետարանին:

Որոշման նախագծով առաջարկվում է «Տաշիր» բարեգործական հիմնադրամին Վանաձոր քաղաքում գտնվող՝ 3,172 հեկտար հողամասի տարածքում «Տաշիր» բարեգործական հիմնադրամի ֆինասնավորմամբ «Ֆիլիշին» սահմանափակ պատասխանատվությամբ ընկերության կողմից կատարված կառուցման  շինարարական աշխատանքների` 1,058,993,172 ՀՀ դրամ սկզբնական արժեքով արդյունքը անհատույց գործարքի միջոցով հանձնել Հայաստանի Հանրապետության Լոռու մարզպետարանի:

Որոշման մեջ նշված է, որ արդիականացման աշխատանքներն իրականացվել են «Հիվանդությունների կանխարգելում և վերահսկում» վարկային ծրագրի շրջանակներում նախագծվել են ԲԿ-ի նոր մասնաշենքերը, ձեռք են բերվել արդի բժշկական սարքավորումներ և կահույք, իսկ շինարարական աշխատանքները իրականացվել են «Տաշիր» բարեգործական հիմնադրամի և ՀՀ պետական բյուջեի միջոցների հաշվին:

ԲԿ արդիականացումից հետո խնդիրներ են ծագել, սակայն կառուցված շենքերի ընդունման և ՀՀ օրենքով սահմանված կարգով անշարժ գույքի գրանցման հետ` կապված անհրաժեշտ հողհատկացման, ինչպես նաև շինարարությունից առաջ և դրա ընթացքում պահանջվող քաղաքաշինական փաստաթղթերի ստացման ընթացակարգերի հետ։

Ուստի նախագծի հիմնավորման մեջ նշվում է, որ որոշման նախագծի նպատակն է օրենքով սահմանված կարգով ընդունել Հայաստանի Հանրապետությանը նվիրած հողամասը, այնուհետև Հայաստանի Հանրապետությանը սեփականության իրավունքով պատկանող հողի վրա գրանցել պետական միջոցներով և ՀՀ-ին արված բարեգործության շրջանակներում կառուցված շենքերի նկատմամբ ՀՀ սեփականության իրավունքը:

ՀՀ կառավարության որոշման նախագծի ընդունումը, ըստ հիմնավորման,  կնպաստի ՀՀ Լոռու մարզում գործող «Վանաձորի ԲԿ» ՓԲԸ կողմից մատուցվող բժշկական օգնության ծառայությունների որակի բարձրացմանը, կբարելավի դիմելիության ցուցանիշները, ինչպես նաև կնպաստի մարզում առկա բժշկական ծառայությունների մատչելիության աճին: