14.12.2025 | 12:28
«ՀԷՑ»-ը տեղեկացնում է. ուժեղ քամիները հոսանքազրկումների պատճառ են դարձել
ՀԱՄԱՍ-ը վերադարձել է Իսրայելի հետ հրադադարի ռեժիմի շուրջ բանակցություններին
Քաղաքականություն
13.02.2025 | 18:10
Պաղեստինյան ՀԱՄԱՍ խմբավորումը կշարունակի կատարել Իսրայելի հետ Գազայի հատվածում հրադադարի համաձայնագրի պայմանները, ինչպես նաև կվերսկսի իսրայելցի պատանդների փոխանակումը պաղեստինցի գերիների հետ, փոխանցում է The Moscow Times-ը։
Համապատասխան հայտարարությունը հայտնվել է ՀԱՄԱՍ-ի Telegram-ի ալիքում՝ նրա առաջնորդ Խալիլ ալ-Հայյայի և Եգիպտոսի ու Կատարի ներկայացուցիչների միջև բանակցություններից հետո։
«Խորհրդակցություններն անցել են դրական, և ՀԱՄԱՍ-ը հաստատում է, որ շարունակում է կատարել համաձայնագրի պայմանները, ներառյալ՝ գերիների [պատանդների] փոխանակման գործընթացի իրականացումը սահմանված ժամկետում», – ասվում է հայտարարության մեջ։
Փետրվարի 10-ին ՀԱՄԱՍ-ի ռազմական թևի խոսնակ Աբու Ուբայդան հայտարարել էր պատանդների նոր խմբի ազատ արձակման հետաձգման մասին, որոնք պետք է տուն վերադառնային փետրվարի 15-ին: Նա բացատրել էր, որ Իսրայելը խախտել է գործարքի պայմանները, երբ «հետաձգել է տեղահանվածների վերադարձը անկլավի հարավից դեպի հյուսիս, կրակ է բացել Գազայի բնակիչների վրա և չի տրամադրել բոլոր տեսակի մարդասիրական օգնությունն անհրաժեշտ քանակությամբ»։
Դրանից հետո Իսրայելի վարչապետ Բենիամին Նեթանյահուն սպառնացել էր վերսկսել ռազմական գործողությունները Գազայում, եթե ՀԱՄԱՍ-ը մինչև փետրվարի 15-ի կեսօր ազատ չարձակի իսրայելցի պատանդներին։
ԱՄՆ նախագահ Դոնալդ Թրամփն իր հերթին հայտարարել էր, որ Գազայի հատվածում հրադադարի մասին համաձայնագիրը պետք է չեղարկվի, եթե ՀԱՄԱՍ-ը չազատի բոլոր պատանդներին մինչև շաբաթվա վերջ, նաև իսկական «դժոխք» էր խոստացել ՀԱՄԱՍ-ին։
Թարգմանությունը՝ Տաթև Ֆռանգյանի
