08.09.2026 | 23:30
Պապիկյանը այցելել է ՊՆ ուսումնական կենտրոն, հրամկազմին տրվել են մի շարք հանձնարարականներ
Ռուսաստանը սկսել է խումբ ստեղծել՝ Ուկրաինայի հարցով ԱՄՆ-ի հետ բանակցելու համար. Կրեմլ
Քաղաքականություն
13.02.2025 | 16:19
Ռուսաստանը սկսել է խումբ ստեղծել՝ Ուկրաինայի հարցով ԱՄՆ-ի հետ բանակցելու համար։ Այս մասին լրագրողների հետ ճեպազրույցի ժամանակ ասել է ՌԴ նախագահի մամուլի քարտուղար Դմիտրի Պեսկովը, փոխանցում է BBC-ի ռուսական ծառայությունը։
«Առայժմ կառաջարկեինք մեզանից առաջ չընկնել։ Կա քաղաքական կամք երկխոսություն վարելու՝ կարգավորման որոնման համար, որն ընդգծվել է երկու կողմերի երեկվա զրույցի ժամանակ։ Համաձայնություն կա, որ այս կարգավորումը հնարավոր է խաղաղ բանակցությունների միջոցով»,- ասել է ՌԴ ղեկավարի մամուլի քարտուղարը։
Նրա խոսքով՝ Ռուսաստանը սկսել է բանակցային խումբ պատրաստել՝ երկու երկրների ղեկավարների հանդիպում կազմակերպելու համար, իսկ Վլադիմիր Պուտինն ու Դոնալդ Թրամփը պայմանավորվել են կապ պահպանել։
Բանակցային գործընթացին Եվրոպայի մասնակցության մասին հարցին Պեսկովը պատասխանել է, որ այս պահին գաղափար չկա երկխոսության հնարավոր ձևաչափի մասին։ Ըստ նրա՝ Կրեմլը հաշվի կառնի 2015 թվականի մինսկյան համաձայնագրերի «պերճախոս» փորձը։
Փետրվարի 12-ին ԱՄՆ նախագահ Դոնալդ Թրամփը հեռախոսազրույց է ունեցել ՌԴ ղեկավար Վլադիմիր Պուտինի, այնուհետև Ուկրաինայի նախագահ Վլադիմիր Զելենսկիի հետ։ Թրամփն ասել է, որ ԱՄՆ-ը և Ռուսաստանը պայմանավորվել են, որ երկու երկրների թիմերն «անհապաղ բանակցություններ կսկսեն»։
Թարգմանությունը՝ Տաթև Ֆռանգյանի
