19.02.2026 | 21:13
ՀՀ-ին և Ճապոնիային հաջողվել է հետևողականորեն զարգացնել քաղաքական երկխոսությունը. Մհեր Գրիգորյան
Եվրոպական երկրները պահանջում են ԵՄ-ի մասնակցությունն Ուկրաինայի հարցով բանակցություններին՝ Թրամփի հայտարարությունների ֆոնին
Քաղաքականություն
13.02.2025 | 12:57
Ուկրաինան ու Եվրոպան պետք է մասնակցեն ցանկացած բանակցությունների՝ կապված Ուկրաինայում պատերազմի ավարտի հետ։ Այս մասին ասվում է Ֆրանսիայի, Գերմանիայի, Լեհաստանի, Մեծ Բրիտանիայի, Իսպանիայի, Իտալիայի, ինչպես նաև ԵՄ արտաքին քաղաքականության ծառայության ու Եվրահանձնաժողովի համատեղ հայտարարության մեջ։ Այն հրապարակվել է նախօրեին ԱՄՆ և ՌԴ նախագահներ Դոնալդ Թրամփի ու Վլադիմիր Պուտինի հեռախոսազրույցից հետո, գրում է DW-ի ռուսական ծառայությունը։
«Արդար ու երկարատև խաղաղությունն Ուկրաինայում անհրաժեշտ պայման է հուսալի տրանսատլանտյան անվտանգության համար»,- ասվում է հայտարարությունում։
Եվրոպացի դիվանագետներն ընդգծել են՝ իրենք անհամբեր սպասում են բանակցություններին «ամերիկյան դաշնակիցների հետ» հետագա գործողությունների վերաբերյալ։ Ընդհանուր նպատակը պետք է լինի «Ուկրաինան ուժի դիրք տեղափոխելը»։
Եվրոպական երկրները, որոնց արտգործնախարարները ստորագրել են հայտարարությունը, նաև պատրաստակամություն են հայտնում ուժեղացնել իրենց աջակցությունն Ուկրաինային և անհրաժեշտ են համարում այդ երկրին անվտանգության երաշխիքներ տրամադրել։
«Մենք պատրաստ ենք ուժեղացնել մեր աջակցությունն Ուկրաինային, մենք պաշտպանում ենք նրա անկախությունը, ինքնիշխանությունը և տարածքային ամբողջականությունը Ռուսաստանի ագրեսիվ պատերազմի պայմաններում։ Մենք կիսում ենք Ուկրաինային Ուկրաինային աջակցելու նպատակը՝ մինչև արդար, համապարփակ և կայուն խաղաղության հասնելը»,- ասվում է հայտարարությունում։
Հավելենք, որ նախօրեին տեղի է ունեցել ԱՄՆ-ի և Ռուսաստանի նախագահների առաջին հաստատված հեռախոսազրույցը, որի կարևոր թեման Ուկրաինայում պատերազմի ավարտի հնարավորությունն էր։ Վլադիմիր Պուտինի հետ զրույցից հետո Դոնալդ Թրամփը զանգահարել է նաև Ուկրաինայի նախագահ Վլադիմիր Զելենսկիին։
Ավելի ուշ Սպիտակ տանը լրագրողների հետ զրույցում Թրամփը հայտարարել է Պուտինի հետ Սաուդյան Արաբիայում անձնական հանդիպման մասին և կարծիք հայտնել, որ Ուկրաինայի անդամակցությունը ՆԱՏՕ-ին տեղին չէ, իսկ օկուպացված բոլոր տարածքները Կիևին վերադարձնելը «հավանական չէ»:
Թարգմանությունը՝ Էմմա Չոբանյանի
