13.01.2026 | 18:20
ԵՄ-ն խոստանում է պատժամիջոցներ կիրառել Իրանի նկատմամբ «սարսափելի զոհերի պատճառով»
Բուկետներ ենք բաժանել. Ծառուկյանի գործով վկան «բուկլետը» շփոթեց «բուկետի» հետ
Հասարակություն
12.02.2025 | 19:49
«Բարգավաճ Հայաստան» կուսակցության առաջնորդ Գագիկ Ծառուկյանի և «Մուլտի գրուպ» կոնցեռնի տնօրեն Սեդրակ Առուստամյանի գործով այսօր դատարան էր հրավիրվել վկա Ռ. Մ.-ն:
Վերջինս ընտրակաշառքի գործով մեղադրյալ է եղել, սակայն նրա նկատմամբ քրեական հետապնդումը դադարեցվել է:
Վկան պարտավոր է ցուցմունք տալ, սակայն այն դեպքում, երբ որպես վկա հարցաքննվում է մի գործով, որով մեղադրյալ է եղել, իրավունք ունի լռելու:
Դատարանն այս հանգամանքը պարզաբանեց վկային, սակայն շուտով պարզվեց, որ նա լիարժեք չի ընկալել իր իրավունքների և պարտականությունների վերաբերյալ պարզաբանումը: Թեև ազատ շարադրանքով ցուցմունք չտվեց՝ պատասխանեց հանրային մեղադրողի որոշ հարցերի, իսկ որոշ հարցերի դեպքում ասաց, որ չի հիշում հանգամանքները:
Մեղադրողի հարցին՝ 2017 թվականի ընտրությունների ժամանակ որևէ գործողություն արե՞լ եք Բարգավաճ Հայաստանի օգտին, վկան ասաց՝ «բուկետներ ենք բաժանել»:
Շուտով պարզվեց՝ խոսքը «բուկլետի» մասին է:
Այն պահից, երբ դատավարության մասնակիցների համար պարզ դարձավ, որ վկան իր լռելու իրավունքի մասին ճիշտ պատկերացում չունի, նրան բացատրեցին, որ լռությունն իր դեմ օգտագործվել չի կարող, իրեն դրա համար քրեական պատասխանատվության չեն ենթարկի, որից հետո նա ասաց, որ չի ցանկանում ցուցմունք տալ:
Հաջորդ դատական նիստին կհրապարակվեն նրա տված նախաքննական ցուցմունքները:
Արաքս Մամուլյան
