04.04.2026 | 11:55
Երևանի Կենտրոն վարչական շրջանում փոշու պարունակությունը գերազանցել է սահմանային թույլատրելի կոնցենտրացիան
Կրեմլը մեկնաբանել է ԵՄ-ին ՀՀ անդամակցության գործընթացի մեկնարկի մասին օրինագծի ընդունումը
Քաղաքականություն
12.02.2025 | 15:08
Եվրամիությանն անդամակցելու ցանկությունը Հայաստանի ինքնիշխան իրավունքն է, սակայն ՀՀ ժողովուրդն առայժմ շարունակում է դիվիդենտներ ստանալ Եվրասիական տնտեսական միությանն (ԵՏՄ) անդամակցությունից։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը, գրում է Ինտեֆաքսը։
«Դա Հայաստանի ինքնիշխան իրավունքն է, բայց, իհարկե, հայերը, ինչպես նաև բոլորը պետք է հասկանան, թե որքանով է սա փոխադարձ ցանկություն, և ինչպես են իրենք՝ եվրոպացիները վերաբերվում դրան։ Առայժմ ելնում ենք նրանից, որ Հայաստանը շարունակում է դիվիդենտներ ստանալ ԵՏՄ-ին անդամակցությունից եվրասիական տնտեսական ինտեգրման գործընթացներում, և այդ դիվիդենտներն առավել քան ակնհայտ են»,- ասել է Պեսկովը՝ մեկնաբանելով ՀՀ խորհրդարանի կողմից ԵՄ-ին միանալու մասին օրինագծի առաջին ընթերցմամբ ընդունումը։
Կրեմլի ներկայացուցիչը նշել է, թե, «ըստ ամենայնի, Հայաստանում կան որոշակի քաղաքական ուժեր, որոնք կարծում են, որ կողմնորոշումը դեպի Եվրամիություն, հավանաբար, Եվրամիության շահագրգռվածության հստակ ըմբռնման բացակայության պայմաններում, այս կողմնորոշումը որոշակի լրացուցիչ դիվիդենտներ կապահովի երկրի և ժողովրդի շահերի համար»։
Պեսկովի խոսքով՝ պետք է ուշադրություն դարձնել նաև Եվրամիությանն անդամակցության գործընթացի բարդությանը։
«Մենք գիտենք բազմաթիվ երկրների փորձը, որոնք երկար հերթի մեջ են հայտնվել այս գործընթացում, որը չափվում է տասնամյակներով»,- ասել է Կրեմլի խոսնակը։
Հիշեցնենք, որ ՀՀ Ազգային Ժողովն առաջին ընթերցմամբ ընդունել է քաղաքացիական նախաձեռնության կարգով ներկայացված «Եվրոպական Միությանը Հայաստանի Հանրապետության անդամակցելու գործընթացի մեկնարկի մասին» օրենքի նախագիծը։
Թարգմանությունը՝ Էմմա Չոբանյանի
