09.08.2026 | 22:30
Արթուր Ղարիբյանը հաղթական դուբլ է գրանցել «Զենիթի» դեմ խաղում. ՏԵՍԱՆՅՈՒԹ
ԱՄՆ-ը կարող է աշխարհի մի շարք երկրներում հյուպատոսություններ փակել․ NBC News
Քաղաքականություն
12.02.2025 | 14:41
Պետքարտուղարության ծախսերը կրճատելու նպատակով նախագահ Դոնալդ Թրամփի վարչակազմը դիտարկում է ամբողջ աշխարհում ԱՄՆ մի շարք հյուպատոսություններ և դիվանագիտական ներկայացուցչություններ փակելու հարցը։ Այս մասին NBC News-ին ասել են վարչակազմի երեք պաշտոնյաները։
Նշվում է, որ կարող են փակվել Եվրոպայում, Կանադայում, Մեքսիկայում և Խաղաղ օվկիանոսի կղզիներում հյուպատոսությունները: Պաշտոնյաները հայտնել են, որ Թրամփը վերանայել է հյուպատոսությունների ցանկը, սակայն վերջնական որոշում չի կայացվել, և որ հնարավոր փակման ժամկետները դեռ պետք է սահմանվեն:
Որոշ հյուպատոսությունների աշխատանքի հարցը վերանայվել է Պետքարտուղարության պաշտոնյաների կողմից, որոնց խնդրել են գնահատել դրանց համապատասխանությունը Թրամփի «Առաջին հերթին Ամերիկան» ծրագրին՝ որպես կարևորության չափանիշ:
Պաշտոնյաները նաև հաշվի են առնում հյուպատոսությունների դիվանագիտական անհրաժեշտությունը և կառավարության լրացուցիչ գործունեության տեսակները, որոնք կարող են իրականացվել այնտեղ, ինչպիսիք են ռազմական շփումները այլ երկրների հետ և հետախուզության հավաքագրումը:
Ըստ պաշտոնյաների՝ Եվրոպայում հյուպատոսությունների հիմնական մասը, որոնք կարող են հարվածի տակ հայտնվել, գտնվում են Գերմանիայում և Ֆրանսիայում։ Պետքարտուղարությունը հյուպատոսություններից տեղեկատվություն է խնդրել դրանց ընդհանուր գործունեության մասին:
Լրատվամիջոցի մեկնաբանության խնդրանքին Պետքարտուղարությունից անմիջապես չեն պատասխանել։
Թարգմանությունը՝ Էմմա Չոբանյանի
