Շահրամանյա՛ն, պատմի՛ր, ինչպե՞ս ես ախրանիկներով ԼՂ-ից դուրս եկել, իսկ մնացածը չեն կարողացել. Սիմոնյան․ ՏԵՍԱՆՅՈՒԹ

«Նախ՝ Շահրամանյանը թող պատմի՝ ինչպե՞ս է ինքն ախրանիկներով կարողացել Ղարաբաղից դուրս գալ, իսկ մնացած գործընկները չեն կարողացել։ Եթե ինձ հարց ունի ԱԺ-ում նամակների բաժին կա կարող է դիմել։ Ես կքննարկեմ այդ նամակը, միգուցե և պատասխանեմ»,- այս մասին ԱԺ-ում լրագրողների հետ ճեպազրույցում ասաց Ալեն Սիմոնյանն՝ արձագանելով Սամվել Շահրամանյանին։

Ալեն Սիմոնյանը հստակեցրեց, որ ինքը Լեռնային Ղարաբաբաղի ժողովրդի մասին ընդհանրական ոչինչ չի ասել, այլ՝ կոնկրետ մարդկանց մասին։

«Ես ասել եմ կոնկրետ մարդկանց մասին, ովքեր ոչ թե վերադառնում էին Ղարաբաղ, այլ վերադառնում էին Հյուսիսային պողոտայի իրենց տները, ՀՀ-ում կառուցած իրենց «ասաբնյակները», իրենց բիզնեսը կառուցում էին ոչ թե Ղարաբաղում, որովհետև այնտեղ իրենց ապագան և Ղարաբաղի ապագան չէին տեսնում, այլ կապում էին երկրից դուրս գալու հետ: Այն մարդիկ, որոնց մասին խոսել եմ, իրենք դա հասկացել են»,- նշեց Սիմոնյանը:

Հիշեցնենք, որ Արցախի վերջին նախագահ Սամվել Շահրամանյանը հայտարարությամբ է հանդես եկել՝ պահանջելով ԱԺ նախագահ Ալեն Սիմոնյանից հրապարակային ներողություն խնդրել։

Երեկ ԱԺ-ի հայտարարությունների ժամին Ալեն Սիմոնյանն ասել էր․ «Ղարաբաղից մեզ զանգում, ասում էին`ստեղ էլ չենք մնալու, բացեք սահմանը, դուրս ենք գալու։ Ես գլուխ եմ խոնարհում բոլոր այն մարդկանց առաջ, ովքեր զոհվել են ու պաշտպանել իրենց հայրենիքը, բայց ես չեմ կարող չնկատել այն մարդկանց, ովքեր մեկ ստորագրությամբ պետությունը չեղյալ հայտարարեցին ու հրաժարվեցին դրա համար պայքարելուց։ Եղել են մարդիկ, այո՛, ովքեր կռվել են և հերոսներ են, բայց կային նաև մարդիկ, ովքեր թողել ու փախել են»։