30.04.2026 | 09:45
ՀՀ տարածքում ավտոճանապարհները հիմնականում անցանելի են
Թուրքիան և Թուրքմենստանը Իրանի տարածքով գազի մատակարարման համաձայնագիր են ստորագրել
Քաղաքականություն
11.02.2025 | 18:38
Թուրքիան և Թուրքմենստանը համաձայնագիր են ստորագրել՝ դյուրացնելու թուրքմենական բնական գազի մատակարարումը Թուրքիա՝ նշանավորելով երկու երկրների միջև էներգետիկ համագործակցության կարևոր քայլ։ Այս մասին հայտարարել է Թուրքիայի էներգետիկայի նախարար Ալփարսլան Բայրաքթարը, գրում է Reuters-ը։
Նա ասել է, որ գործարքը կնքվել է թուրքական պետական նավթային BOTAS-ի և Թուրքմենստանի «Թուրքմենգազի» միջև, այն նպատակ ունի սկսել գազի մատակարարումը մարտի 1-ից։
Թուրքիան տարեկան սպառում է ավելի քան 50 միլիարդ խորանարդ մետր գազ։ Այն հիմնված է Ռուսաստանից, Ադրբեջանից և Իրանից գազային խառնուրդից, ինչպես նաև տարբեր մատակարարներից հեղուկ գազի ներմուծումից:
«Այս համաձայնագրով, որի վրա աշխատել ենք երկար տարիներ, մենք է՛լ ավելի կզարգացնենք ռազմավարական համագործակցությունը երկու երկրների միջև՝ միաժամանակ ամրապնդելով մեր երկրի և տարածաշրջանի բնական գազի մատակարարման անվտանգությունը»,- նշել է Բայրաքթարը։
Նա ավելի վաղ ասել էր, որ Թուրքիան կարող է տարեկան գնել մինչև 2 միլիարդ խորանարդ մետր գազ Թուրքմենստանից, իսկ գազը նախատեսվում է տեղափոխել Իրանի գոյություն ունեցող բնական գազի ցանցով։ Կոնկրետ մանրամասներ նոր համաձայնագրով մատակարարվելիք գազի ծավալների և Իրանի տարածքով տարանցման ստույգ պայմանների վերաբերյալ չեն նշվում։
Թարգմանությունը՝ Էմմա Չոբանյանի
