17.07.2026 | 22:44
Երթևեկության կազմակերպման փոփոխություն կկատարվի Երևանի Վարշավյան փողոցում
Ելիսեյան պալատը՝ Մակրոն-Փաշինյան հանդիպման մասին
Քաղաքականություն
11.02.2025 | 11:30
Ելիսեյան պալատը նախօրեին Փարիզում ՀՀ վարչապետ Նիկոլ Փաշինյանի և Ֆրանսիայի նախագահ Էմանուել Մակրոնի հանդիպման վերաբերյալ հաղորդագրություն է տարածել։
Նշվում է, որ Էմանուել Մակրոնը նախ շնորհակալություն է հայտնել Հայաստանի վարչապետին Արհեստական բանականության գործողությունների գագաթնաժողովին մասնակցելու համար, որը ցույց է տալիս Հայաստանի և Եվրամիության տեսակետների սերտաճումը նորարարության ու նոր տեխնոլոգիաների հետ կապված։ Երկու երկրների ղեկավարները պայմանավորվել են շարունակել Ֆրանսիայի և Հայաստանի միջև համագործակցության նախագծերի զարգացումը, մասնավորապես, էներգետիկայի, պաշտպանության և տրանսպորտի ոլորտներում։
«Այնուհետև երկու երկրների ղեկավարները քննարկել են տարածաշրջանային իրավիճակը։ Պետության ղեկավարը վերահաստատել է Ֆրանսիայի լիակատար աջակցությունը Հայաստանի և Ադրբեջանի միջև հարաբերությունների կարգավորմանը, ինչպես նաև միջազգային իրավունքին համապատասխան խաղաղության պայմանագրի ստորագրմանը։ Նա նաև վերահաստատել է Ֆրանսիայի վճռականությունը՝ աջակցելու Հայաստանի տարածքային ամբողջականությանը և ինքնիշխանությանը, ինչպես նաև հայ ժողովրդի՝ խաղաղության, անվտանգության և ժողովրդավարության ձգտումներին»,-ասվում է հաղորդագրության մեջ։
Կողմերը նաև քննարկել են կենսաբազմազանության վերաբերյալ COP17 համաժողովի նախապատրաստումը, որը Հայաստանը կընդունի 2026 թվականին։ Ֆրանսիայի ղեկավարը նշել է, որ Փարիզը լիովին պատրաստ է անհրաժեշտ աջակցություն ցուցաբերել Հայաստանին COP-ի նախապատրաստման ընթացքում։
Թարգմանությունը՝ Էմմա Չոբանյանի
