19.02.2026 | 21:13
ՀՀ-ին և Ճապոնիային հաջողվել է հետևողականորեն զարգացնել քաղաքական երկխոսությունը. Մհեր Գրիգորյան
Ռումինիայի նախագահը հայտարարել է հրաժարականի մասին
Քաղաքականություն
10.02.2025 | 17:40
Ռումինիայի նախագահ Կլաուս Յոհանիսը հայտարարել է փետրվարի 12-ին հրաժարական տալու որոշման մասին։ Այդ մասին նա հայտարարել է այն բանից հետո, երբ ընդդիմությանը հաջողվել է երրորդ փորձից նախագահի իմփիչմենթի հարցը ներկայացնել խորհրդարանի քննարկմանը, հաղորդում է «Ազատություն» ռադիոկայանի ռումինական ծառայությունը։
«Այսօր մեկնարկել է նախագահին պաշտոնանկ անելու ընթացակարգը։ Սա անխոհեմ քայլ է, քանի որ ես լքում եմ պաշտոնը նոր նախագահի ընտրությունից մի քանի ամիս անց։ Սա անհիմն է, քանի որ ես երբեք, կրկնում եմ՝ երբեք չեմ խախտել Սահմանադրությունը»,- ասել է նա։
Յոհանիսը նշել է, որ դա «վնասակար գաղափար է», քանի որ դրանից ոչ ոք չի շահի, «բոլորը կկորցնեն»։ Նրա խոսքով՝ գործընկերներից ոչ ոք չի հասկանա, թե ինչու են Ռումինիայում նախագահին պաշտոնանկ անում այն բանից հետո, երբ նոր նախագահի ընտրության գործընթացը սկսվել է։
«Այս մոտեցումը ոչ ոք չի հասկանա, մենք ծիծաղի առարկա ենք դառնալու»,- ասել է նա։
Կլաուս Յոհանիսի պաշտոնավարման ժամկետը լրացել է 2024 թվականի դեկտեմբերի 21-ին, սակայն մինչ այդ՝ դեկտեմբերի 6-ին, Ռումինիայի Սահմանադրական դատարանը չեղյալ է համարել նախագահական ընտրությունների առաջին փուլի արդյունքները։ Կրկնակի նախագահական ընտրությունները նշանակված են 2025 թվականի մայիսի սկզբին։
Միաժամանակ, Ռումինիայի Գերագույն դատարանը որոշել է, որ Յոհանիսը պետք է մնա իր պաշտոնում՝ մինչև նախագահի ընտրվելը։
Թարգմանությունը՝ Տաթև Ֆռանգյանի
