13.01.2026 | 18:20
ԵՄ-ն խոստանում է պատժամիջոցներ կիրառել Իրանի նկատմամբ «սարսափելի զոհերի պատճառով»
Անհրաժեշտ է պահպանել 100 դրամ սակագինը․ «Ազգային առաջընթաց»-ի նախագիծն ավագանու նիստի օրակարգում է
Քաղաքականություն
10.02.2025 | 15:45
Երևանի ավագանու «Ազգային առաջընթաց» խմբակցությունն առաջարկում է փոփոխություններ իրականացնել միասնական տոմսային համակարգում։ Փետրվարի 11-ին կայանալիք ավագանու հերթական նիստին քննարկվելու է ընդդիմադիր խմբակցության ներկայացրած նախագիծը, որով առաջարկում են ներդնել 100 դրամ արժեքով մեկանգամյա օգտագործման տոմս ձեռքբերման պահից 10 օրվա ընթացքում ակտիվացման (օգտագործելու) ժամկետով, մեկ ուղևորություն կատարելու հնարավորությամբ։
Սա նշանակում է, որ խմբակցությունն այս տարբերակն առաջարկում է փետրվարի մեկից սահմանված 150 դրամ սակագնի փոխարեն։
«Սոցիալական անարդարության մեղմացման, ցածր եկամուտներ ունեցող քաղաքացիների առանց այդ էլ դժվար կացությունը չխորացնելու և հանրային տրանսպորտի գրավչությունը բարձրացնելու նպատակով անհրաժեշտ է պահպանել 100 դրամ արժողությամբ մեկանգամյա ուղևորափոխադրման հնարավորությունը` միաժամանակ ուղիներ փնտրելով տրանսպորտային համակարգի ֆինանսավորման և սուբսիդավորման համար, մասնավորապես, ավելի բարձր եկամուտներ ունեցող քաղաքացիներից գանձվող տուրքերի հաշվին լրացուցիչ միջոցներ ուղղել տրանսպորտային համակարգի սպասարկմանը՝ նկատի ունենալով, որ որակյալ հանրային ուղևորափոխադրումների կազմակերպումը ազդում է ոչ միայն բուն տրանսպորտից օգտվողների, այլև երթևեկության բլոր մասնակիցների և, ընդհանուր առմամբ, քաղաքի բնակիչների կյանքի որակի վրա»,- ասված է նախագծի հիմնավորման մեջ։
Տվյալ նախագիծը ավագանու նիստի օրակարգում է զեկուցվող տարբերակով, ինչը նշանակում է, որ ավագանու անդամները կքննարկեն այն։
Արփի Հակոբյան
