17.07.2026 | 23:30
ԲԸՏՄ-ում քննարկվել են COP17-ի նախապատրաստական աշխատանքներն ու տեսչության մասնակցությունը
Հազարավոր հյուսիսկորեացիներ ՌԴ են ուղարկվել՝ շինաշխատանքներ կատարելու համար
Քաղաքականություն
10.02.2025 | 17:06
Հազարավոր հյուսիսկորեացիներ 2024 թվականին ուղարկվել են Ռուսաստան՝ շինաշխատանքներ կատարելու, հաղորդում է հարավկորեական Yonhap լրատվական գործակալությունը՝ վկայակոչելով երկրի Ազգային հետախուզական ծառայությանը (NIS):
Նշվում է, որ սա խախտում է ՄԱԿ-ի Անվտանգության խորհրդի բանաձևը, որն ընդունվել է Փհենյանի կողմից զենքի փորձարկումների հետ կապված և Հյուսիսային Կորեային արգելում է իր քաղաքացիներին արտագնա աշխատանքի ուղարկել։ Փաստաթղթի համաձայն՝ արտասահմանում գտնվող հյուսիսկորեացի բոլոր աշխատողները պետք է տուն վերադառնային մինչև 2019 թվականի դեկտեմբեր:
Նշվում է, որ ԿԺԴՀ-ի քաղաքացիները գալիս են Ռուսաստան աշխատելու, ենթադրաբար, ուսանողների քողի տակ։ Ռոսստատի տվյալների համաձայն, որոնք վկայակոչում են Yonhap-ը և Radio Free Asia-ն, 2024 թվականին ԿԺԴՀ-ից 13,221 ուսանող է մուտք գործել Ռուսաստան։ Սա 12 անգամ ավելի է, քան նախորդ տարի։ 2024 թվականին Ռուսաստան մուտք գործած հյուսիսկորեացիներից 7,887 մարդ հայտարարել է, որ այցի նպատակը կրթություն ստանալն է։
Միաժամանակ, ըստ Հարավային Կորեայի իշխանությունների, Փհենյանը ռազմական անձնակազմ է ուղարկում Ռուսաստան՝ մասնակցելու Ուկրաինայի դեմ ռուսական պատերազմին։ Շուրջ 11 հազար հյուսիսկորեացի զինվորներ են տեղափոխվել ՌԴ Կուրսկի շրջան՝ Ուկրաինայի զինված ուժերի հետ կռվելու համար, հիշեցնում են Yonhap-ի հեղինակները։
Թարգմանությունը՝ Տաթև Ֆռանգյանի
