08.10.2026 | 23:18
Քննարկվել են ՀՀ-ի և Իրանի մաքսային մարմինների միջև նախնական էլեկտրոնային տվյալների փոխանակման համակարգի գործարկման քայլեր
Սի Ցզինպինը 10 տարվա ընթացքում առաջին անգամ մայիսի 9-ին կայցելի ՌԴ
Քաղաքականություն
10.02.2025 | 15:36
Չինաստանի նախագահ Սի Ցզինպինը պատրաստվում է 2025 թվականի մայիսի 9-ին Մոսկվա ժամանել՝ նշելու Հայրենական մեծ պատերազմի 80-ամյակը, հայտնել է Չինաստանում ՌԴ դեսպան Իգոր Մորգուլովը, փոխանցում է The Moscow Times-ը։
«Իր հերթին, [Սի Ցզինպինը] Վլադիմիր Պուտինին հրավիրել է Չինաստան՝ սեպտեմբերի սկզբին նախատեսված տոնակատարություններին»,- ասել է դիվանագետը «Россия 24» հեռուստաալիքի եթերում:
Այս տարի Չինաստանը տոնելու է Ճապոնիայի դեմ տարած հաղթանակի և Երկրորդ համաշխարհային պատերազմի ավարտի 80-ամյակը։
Պեկինը դեռևս պաշտոնապես չի հաստատել Սի Ցզինպինի այցը Մոսկվա։ Վերջին անգամ նա Մոսկվայում Հաղթանակի շքերթին ներկա է եղել 2015 թվականին։
Պուտինին ուղղված ամանորյա շնորհավորանքներում Չինաստանի ղեկավարը խոստացել է խորացնել համագործակցությունը Ռուսաստանի հետ «համաշխարհային հակաֆաշիստական պատերազմում» հաղթանակի 80-ամյակի տարում։
Ավելի վաղ Կրեմլը հայտարարել էր, որ Ռուսաստանը մայիսի 9-ին «շատ պետությունների ղեկավարների» է հրավիրել Մոսկվա։
Հաղթանակի շքերթին մասնակցելու մտադրության մասին հայտարարել են Սլովակիայի վարչապետ Ռոբերտ Ֆիցոն, Սերբիայի նախագահ Ալեքսանդր Վուչիչը, Պաղեստինի ազգային վարչակազմի ղեկավար Մահմուդ Աբբասը և Բրազիլիայի նախագահ Լուիս Ինասիո Լուլա դա Սիլվան։ 2022 թվականին Ռուսաստանի կողմից Ուկրաինա լայնամասշտաբ ներխուժումից հետո ոչ մի օտարերկրյա առաջնորդ չի մեկնել Մոսկվա՝ տոնելու Հաղթանակի օրը։
2023 թվականի մայիսի 9-ին Պուտինը Մոսկվա է հրավիրել հետխորհրդային երկրների՝ Հայաստանի, Բելառուսի, Ղազախստանի, Ղրղզստանի, Տաջիկստանի, Թուրքմենստանի և Ուզբեկստանի ղեկավարներին։ Նրանք, բացառությամբ ՀՀ վարչապետ Նիկոլ Փաշինյանի, ներկա են եղել նաև 2024 թվականի շքերթին։
Թարգմանությունը՝ Տաթև Ֆռանգյանի
