20.02.2026 | 23:28
ԱՄՆ-ն էլ է պահանջում, որ Ուկրաինան հանձնի ամբողջ Դոնբասը․ Զելենսկի
Մերձդնեստրը հրաժարվել է ԵՄ ֆինանսական օգնությունից. Մոլդովայի վարչապետ
Քաղաքականություն
10.02.2025 | 16:46
Չճանաչված Մերձդնեստրի Մոլդովական Հանրապետության իշխանությունները հրաժարվել են գազի գնման համար Եվրամիության ֆինանսական օգնությունից։ Այս մասին հայտարարել է Մոլդովայի վարչապետ Դորին Ռեչանը։
Նրա խոսքով՝ Մոլդովայի կառավարությունը, չնայած Տիրասպոլի որոշմանը, չի արգելափակի հունգարական ընկերության միջոցով գազի տարանցումը Դնեստրի ձախ ափ։ Դրա դիմաց Քիշնևը Տիրասպոլից փոխադարձ քայլեր է պահանջում։
«Միջնաժամկետ հեռանկարում ԵՄ-ի 60 միլիոն եվրոյի առաջարկը լուծում էր, որը կազատեր Մերձդնեստրի տարածաշրջանը շանտաժից և էներգետիկ անկայունությունից: Սակայն Տիրասպոլը մերժել է այս որոշումը»,- ասվում է վարչապետ Դորին Ռեչանի հայտարարության մեջ։
Զեկույցում պարզաբանվում է, որ «հիմնական պայմանը, որը մերժել է Տիրասպոլը, սպառողների համար սակագների աստիճանական բարձրացումն էր»։
«Արդյունքում նրանք չեն կարողանա գումար ստանալ 60 միլիոն եվրոյի եվրոպական օգնության փաթեթից»,- հայտարարել է վարչապետը։
Մինչդեռ, ըստ Մոլդովայի վարչապետը, գազը կշարունակի հոսել դեպի ձախ ափ հունգարական MET Gas and Energy Marketing AG առևտրային ընկերության մասնակցությամբ։ Մատակարարման սխեման ենթադրում է, որ MET Gas and Energy Marketing AG-ն գազ կմատակարարի Մոլդովայի հետ սահմանին՝ համաձայն Moldovagaz-ի հետ կնքված պայմանագրի, իսկ Տիրասպոլը նախապես կվճարի Մոլդովայի հետ սահմանից տարածաշրջան գազի տարանցման ծախսերը՝ համաձայն Moldovagaz-ի և Tiraspoltransgaz-ի միջև համաձայնագրի:
Միևնույն ժամանակ, Մոլդովայի վարչապետը նշել է, որ «սա երկարաժամկետ խնդրի լուծում չէ»։ Կառավարության ղեկավարի հայտարարության մեջ պարզաբանվում է՝ Մոլդովան ակնկալում է, որ Տիրասպոլը, ի պատասխան Քիշնևի տարանցման թույլտվության, «կձեռնարկի մի քանի քայլեր, որոնք ցույց կտան բաց լինելը»։ Մասնավորապես, ազատ կարձակի քաղբանտարկյալներին, կլուծի Ռիբնիցայի լիցեյի խնդիրը, հեռարձակման ցանցում կպահի Մոլդովայի հանրային հեռուստատեսությունը և կհեռացնի 2022 թվականին տեղադրված անցակետերը։
Թարգմանությունը՝ Տաթև Ֆռանգյանի
