Բալթյան երկրներն ամբողջությամբ միացան եվրոպական էլեկտրացանցին

Լատվիան, Էստոնիան և Լիտվան ամբողջությամբ սինխրոնիզացվել են եվրոպական էներգացանցի հետ՝ միանալով Եվրոպական էներգետիկ համակարգին՝ Լիտվա-Լեհաստան միացության միջոցով։ Վիլնյուսում տեղի ունեցած հանդիսավոր արարողությանը մասնակցել են երեք երկրների ղեկավարները, Եվրոպական հանձնաժողովի նախագահ Ուրսուլա ֆոն դեր Լյայենը և Լեհաստանի նախագահ Անջեյ Դուդան․ փոխանցում է euronews-ը։

Այս իրադարձությունը, որը տեղի ունեցավ Խորհրդային Միության փլուզումից ավելի քան երեք տասնամյակ անց, վերջնականապես խզեց Բալթյան երկրների էներգետիկ կապերը Ռուսաստանի հետ։ Դա կարևոր նշանակություն ունի ոչ միայն նրանց, այլև ողջ Եվրոպայի համար՝ որպես ռազմավարական և խորհրդանշական քայլ։

«Վերջապես ազատություն՝ առանց սպառնալիքների և շանտաժի»,- գրել է ֆոն դեր Լյայենը սոցիալական ցանցում։

Շաբաթ օրը բոլոր մնացած էլեկտրահաղորդման գծերը, որոնք կապում էին Բալթյան երկրները Ռուսաստանի, Բելառուսի և Կալինինգրադի մարզի հետ, փուլ առ փուլ անջատվեցին։ Առաջինը Լիտվան անջատվեց, որտեղ Վիլնյուսի կենտրոնում հատուկ տեղադրված 9 մետրանոց ժամացույցը հաշվում էր վերջին վայրկյանները, ապա Լատվիան, և վերջում՝ Էստոնիան։

ՆԱՏՕ-ի անդամ երեք երկրներն իրենց անկախության հռչակումից (1990 թ.) հետո բարդ հարաբերություններ են ունեցել Ռուսաստանի հետ, իսկ 2022-ին Ուկրաինայի դեմ Ռուսաստանի լայնամասշտաբ ներխուժումից հետո այդ հարաբերություններն առավել լարված են դարձել։