Ռուբիոն ԱՄՆ պետքարտուղարի պաշտոնում առաջին այցը կկատարի Մերձավոր Արևելք՝ բաց թողնելով Թուրքիան

ԱՄՆ պետքարտուղար Մարկո Ռուբիոն իր առաջին պաշտոնական այցը կկատարի Մերձավոր Արևելք փետրվարի կեսերին: Այս մասին հաստատել է Պետքարտուղարությունը՝ բացառելով Թուրքիան Ռուբիոյի երթուղուց, գրում է Turkiye today-ը:

Պետքարտուղարության բարձրաստիճան պաշտոնյան ասել է, որ Ռուբիոն կմասնակցի Մյունխենի անվտանգության համաժողովին, այնուհետև փետրվարի 13-ից 18-ը կմեկնի Իսրայել, Արաբական Միացյալ Էմիրություններ, Կատար և Սաուդյան Արաբիա։

Այս այցը հաջորդում է ԱՄՆ նախագահ Դոնալդ Թրամփի հակասական մեկնաբանություններին Գազայի հատվածից պաղեստինցիներին վերաբնակեցնելու վերաբերյալ, առաջարկ, որը լայնորեն քննադատվել է իրավապաշտպան կազմակերպությունների և արաբական երկրների կողմից:

Լրատվամիջոցը նշում է, թե Ռուբիոյի որոշումը՝ ՆԱՏՕ-ի դաշնակից և տարածաշրջանային կարևոր պետություն Թուրքիային բացառելու վերաբերյալ, հարցեր է առաջացրել Մերձավոր Արևելքում Թրամփի վարչակազմի դիվանագիտական ​​առաջնահերթությունների վերաբերյալ:

Նրա այցը կկենտրոնանա Գազայի ապագայի, տարածաշրջանային անվտանգության և տարածաշրջանում դաշինքները վերափոխելու ԱՄՆ-ի ջանքերի շուրջ քննարկումների վրա:

Հունվարին Թուրքիայի արտաքին գործերի նախարար Հաքան Ֆիդանը և ԱՄՆ պետքարտուղար Մարկո Ռուբիոն հեռախոսազրույց էին ունեցել և պայմանավորվել շարունակել ամրապնդել համագործակցությունը երկու երկրների միջև՝ կենտրոնանալով փոխադարձ հարգանքի և վստահության վրա։ Երկու պաշտոնյաներն էլ, ըստ հաղորդագրությունների, ընդգծել էին որպես դաշնակիցներ սերտ համագործակցության կարևորությունը:

Թարգմանությունը՝ Էմմա Չոբանյանի