30.04.2026 | 11:00
Կառավարության նիստը՝ ՈՒՂԻՂ
Վրաստանում խստացրել են բողոքի ցույցերի մասնակցության համար պատիժը
Քաղաքականություն
07.02.2025 | 21:43
Փետրվարի 7-ին Վրաստանում ուժի մեջ են մտել ցուցարարների նկատմամբ պատիժները խստացնող օրենսդրական ուղղումները, հաղորդում են տեղական ԶԼՄ-ները: Օրենսդրական փաթեթը, որը նախօրեին ընդունվել է իշխող «Վրացական երազանք» կուսակցության պատգամավորների կողմից արագացված կարգով, արդեն ստորագրել և հրապարակել է երկրի նախագահ Միխեիլ Ղավելաշվիլին, փոխանցում է DW-ի ռուսական ծառայությունը։
Paper Kartuli պարբերականի համաձայն՝ Վրաստանի Վարչական իրավախախտումների վերաբերյալ օրենսգրքում ավելացվել է պաշտոնյաներին վիրավորելու մասին վարչական հոդված, որը նախատեսում է կալանք մինչև 45 օր ժամկետով կամ տուգանք մինչև 4000 լարիի (մոտ 1400 դոլար):
Քրեական օրենսգրքում փոփոխությունները վերաբերում են անհնազանդության, ոստիկանության ծառայողների նկատմամբ սպառնալիքների և հարձակումների հոդվածներին։ Այս հանցագործությունների համար ազատազրկման պատիժները բարձրացվել են։ Բռնության հրապարակային կոչերն այժմ կարող են պատժվել նաև ազատազրկմամբ։
Փոփոխությունների մի մասը վերաբերում է հանրահավաքների և բողոքի ակցիաների անցկացման կանոններին։ Այժմ, պատժի սպառնալիքի տակ, ցուցարարներին թույլ չեն տալիս փակել կամուրջները, երկաթուղիները, մայրուղիները, թունելները և «քաղաքապետարանի կողմից նշանակված» տրանսպորտային հանգույցները: Արգելվում է նաև խոչընդոտել քաղաքացիների երթևեկությունը և մասնակցել մի ակցիայի, որը ոստիկանությունը պահանջել է ընդհատել։
Բացի այդ, ավելացվում են տուգանքները և վարչական կալանքի ժամկետները մանր խուլիգանության և վանդալիզմի, ոստիկանին չենթարկվելու կամ վիրավորելու, հանրահավաքի կանոնները չկատարելու, վարչական շենքերն ու ճանապարհները փակելու, ցույցերի ժամանակ դիմակներ ու լազերներ օգտագործելու համար։
Թարգմանությունը՝ Տաթև Ֆռանգյանի
