Ուկրաինան նոր հարձակում է սկսել Կուրսկի շրջանում

Ուկրաինայի Զինված ուժերը նոր հարձակում են սկսել Կուրսկի շրջանում, որտեղ ավելի քան վեց ամիս է, ինչ վերահսկում են ռուսական տարածքի մի քանի հարյուր քառակուսի կիլոմետրը, փոխանցում է The Moscow Times-ը։

Ըստ ռազմական բլոգերների՝ Ուկրաինայի Զինված ուժերը հարձակում են սկսել Սուջայից հարավ-արևելք՝ Ֆանասեևկա և Ուլանոկ բնակավայրերի ուղղությամբ։

Ռիլսկի մարզում ռազմական գործողությունների հետևանքով գազատար է վնասվել, հայտնել է Կուրսկի շրջանի նահանգապետ Ալեքսանդր Խինշտեյնը։ Նրա խոսքով՝ հրդեհ է բռնկվել, և խողովակաշարը ստիպված են եղել փակել՝ առանց գազի թողնելով երկու բնակավայր։

Ռուսական զորքերը կորցրել են վերահսկողությունը Չերկասկայա Կոնոպելկայի նկատմամբ։ Alex Parker Returns-ն էլ հայտնում է, որ Ուկրաինայի զինված ուժերին հաջողվել է գրավել նաև Ուլանոկը։ Ուկրաինական գրոհը սկսվել է՝ ասես «կայծակը կապույտ երկնքում», գրում է նա։

Գործողությունը սկսվել է տարածքների ականազերծմամբ, ինչից հետո «Ուկրաինայի զինված ուժերի զրահախմբերը հարձակման են անցել Մախնովկայի ուղղությամբ՝ շրջանցելով Չերկասկայա Կոնոպելկան և շարժվել դեպի Ուլանոկ», գրում են «Ռուսական գարնան» ռազմական բլոգերները։

Հունվարի վերջի դրությամբ՝ Ուկրաինայի Զինված ուժերը վերահսկում էին Կուրսկի շրջանի 442 քառակուսի կիլոմետրը, ինչը գրեթե երեք անգամ ավելի քիչ է, քան օգոստոսին սկսված գործողության գագաթնակետին, երբ երկու շաբաթվա ընթացքում նրանց հաջողվեց զբաղեցնել 1300 քառակուսի կիլոմետր տարածք, գնահատում են Պատերազմի ուսումնասիրության ինստիտուտի (ISW) փորձագետները: Հունվարին, ըստ ISW-ի, ռուսական բանակին հաջողվել է «հետ գրավել» ևս 40 քառ/կմ-ը։

Նշվում է, որ ուկրաինական հակահարձակումը «դիրքերը բարելավելու փորձ է»։ Հենց Սուջայի հարավում է, որ վերջին ամիսներին Ռուսաստանի զինված ուժերը կարողացել են զգալի առաջխաղացում գրանցել և ուկրաինական զինված ուժերին հետ մղել բուն Սուջայից։

Թարգմանությունը՝ Տաթև Ֆռանգյանի