Սիրիայում թուրքական ռազմաբազաներ ստեղծելու ծրագիր չկա. Թուրքիայի ՊՆ

Սիրիայում թուրքական նոր ռազմաբազաներ հիմնելու պլաններ չկան։ Այս մասին հայտնել են Թուրքիայի ՊՆ աղբյուրները, գրում է Turkiye Today-ը։

Ավելի վաղ թուրքական, ինչպես նաև միջազգային մամուլում տեղեկություններ էին տարածվել, որ Անկարան պատրաստվում է Սիրիայում երկու ռազմաբազա հիմնել։ Թուրքական ՊՆ-ն կտրականապես հերքել է Սիրիայում երկու նոր ռազմակայան կառուցելու մտադրության մասին շրջանառվող լուրերը։

«Նման ծրագրերի քննարկումը վաղաժամ է։ Թուրքիայի ուշադրությունը մնում է Սիրիայի ինքնիշխանությանն աջակցելու և տարածաշրջանային կայունությանն ուղղված ջանքերի վրա»,- ասել են նախարարությունից։

ՊՆ պաշտոնյաները պարզաբանել են, որ Սիրիայում Թուրքիայի գլխավոր առաջնահերթությունը մնում է նաև «ահաբեկչական տարրերի», մասնավորապես՝ PYD/YPG-ի վերացումը Սիրիայի հյուսիսում։

«Թուրքիայի նպատակն է աջակցել Սիրիայի կայունությանը, այլ ոչ թե նոր ռազմաբազաներ հիմնել։ Երկու կողմերը համակարծիք են Սիրիայի տարածքային ամբողջականության ապահովման և տարածաշրջանն ահաբեկչական կազմակերպություններից մաքրելու կարևորության շուրջ։ Միասին մշակում ենք համատեղ ճանապարհային քարտեզ՝ բարձրացնելու Սիրիայի ռազմական կարողությունները և լուծելու անվտանգության խնդիրները»,- ընդգծել է ՊՆ պաշտոնյան։

Eurofighter Typhoon-ի գնման վերաբերյալ ՊՆ-ից հաստատել են, որ 40 ինքնաթիռների գնումը դեռևս ընթացքի մեջ է։ Քննարկումները Մեծ Բրիտանիայի պաշտպանության նախարարության հետ շարունակվում են, և Թուրքիայի խնդրանքը մնում է նոր, այլ ոչ թե օգտագործված ինքնաթիռներ գնելը։

«Մենք սպասում ենք գնային առաջարկների, որպեսզի վերջնական տեսքի բերենք գնման գործընթացը և որոշենք ինքնաթիռների կոնֆիգուրացիան»,- պարզաբանել են ռազմական գերատեսչությունից։

Այստեղ նաև կրկնել են Անկարայի դիրքորոշումը Գազայում տիրող իրավիճակի վերաբերյալ, մասնավորապես, դատապարտելով Իսրայելի գործողությունները, ներառյալ՝ Պաղեստինյան տարածքներում UNRWA-ի գործողությունների արգելափակումը:

«Մեր հումանիտար օգնության ջանքերը կշարունակվեն, ներառյալ՝ վերջերս Գազայի համար Հորդանանին 24 տոննա օգնություն մատակարարելը»,- հավելել է ՊՆ պաշտոնյան։

Թարգմանությունը՝ Էմմա Չոբանյանի