Բաքուն ՌԴ-ին ծանուցել է երկրում «Ռոսսոտրուդնիչեստվո»-ի գործունեությունը դադարեցնելու մասին

Բաքուն պաշտոնական ծանուցում է ուղարկել ռուսական կողմին՝ Ադրբեջանի տարածքում «Ռոսսոտրուդնիչեստվո» գործակալության գործունեությունը դադարեցնելու վերաբերյալ։ Այս մասին հայտնում է ադրբեջանական իշխանամերձ Report գործակալությունը՝ վկայակոչելով իր իրազեկ աղբյուրներին։

Լրատվամիջոցը նշում է, թե Ադրբեջանը շարունակում է իր ազգային շահերը պաշտպանելու հետևողական կուրսը և ցույց է տալիս, որ մտադիր չէ հանդուրժել արտաքին միջամտությունն իր ներքին գործերին՝ անկախ նրանից, թե որտեղից է այն գալիս։ Ըստ հրապարակման՝ դրա մասին է վկայում նաև այն, որ նախկինում նման որոշում կայացվել էր ամերիկյան USAID գործակալության վերաբերյալ՝ դեռևս նախագահ Դոնալդ Թրամփի երդմնակալությունից և այս կառույցը լուծարելու մասին նրա հետագա որոշումից առաջ։

Հավելենք, որ Ադրբեջանի ԱԳՆ խոսնակ Այխան Հաջիզադեն այսօր հայտարարել է, որ Բաքուն ամերիկյան  կողմին պաշտոնապես ծանուցել է այն ​​մասին, որ ԱՄՆ Միջազգային զարգացման գործակալությունը (USAID) չունի իրավական հիմքներ Ադրբեջանում գործունեություն ծավալելու համար և այն դադարեցվում է։

«Ադրբեջանն ինքը դարձել է դոնոր և արտաքին օգնության կարիք չունի, հատկապես, ոչ թափանցիկ սխեմաների և կազմակերպությունների միջոցով, որոնց կառուցվածքն ակնհայտորեն հետախուզական բնույթ է կրում»,- ասել է աղբյուրը։

Հավելենք, որ ՌԴ-ի և Ադրբեջանի հարաբերությունների լարվածության ֆոնին՝ ադրբեջանական լրատվամիջոցներում արշավ է սկսվել «Ռոսսոտրուդնիչեստվո»-ին պատկանող «Ռուսական տան» դեմ։ Ադրբեջանի իշխանական ԶԼՄ-ները Բաքվում գործող «Ռուսական տանը» մեղադրում են մշակութային և հումանիտար աշխատանքի քողի տակ հակաադրբեջանական լրտեսական գործունեություն ծավալելու մեջ։

Թարգմանությունը՝ Էմմա Չոբանյանի