Թրամփը հրաման է ստորագրել, որն արգելում է տրանսգենդեր մարզիկներին մասնակցել կանանց մրցումներին

ԱՄՆ նախագահ Դոնալդ Թրամփը գործադիր հրաման է ստորագրել, որով արգելվում է տրանսգենդերներին մասնակցել կանանց սպորտային միջոցառումներին։ Փաստաթուղթը հրապարակվել է Սպիտակ տան կայքում,  այն վերաբերվելու  է դպրոցական, համալսարանական և սիրողական մրցույթներին, գրում է Current time-ը։

«Կանանց սպորտի դեմ պատերազմն ավարտվել է»,-ասել է Թրամփը հրամանի ստորագրման արարողության ժամանակ, որի ընթացքում շրջապատված է եղել տասնյակ երիտասարդ մարզիկներով։

«Իմ վարչակազմը անգործ չի կանգնի և չի դիտի, թե ինչպես են տղամարդիկ ջախջախում և ծեծում կին մարզիկներին»,- հավելել է ԱՄՆ նախագահը։

Նա նաև հայտարարել է, որ ԱՄՆ մերժելու է տրանսգենդեր մարզիկներին վիզաներ տրամադրել։ Թրամփը նաև մտադիր է հասնել նրան, որ Միջազգային օլիմպիական կոմիտեն փոխի կանոնները մինչև 2028 թվականի Լոս Անջելեսի Օլիմպիական խաղերը։

Թրամփի ստորագրած փաստաթուղթը պահանջում է հրամանի անհապաղ կատարում ամբողջ երկրում։ Ցանկացած դպրոց, որը թույլ է տալիս տրանսգենդերներին մասնակցել կանանց սպորտային միջոցառումներին, կկորցնի դաշնային ֆինանսավորումը:

Ուսանողական սպորտի ազգային ասոցիացիայի (NCAA) նախագահը դեկտեմբերին Սենատի լսումների ժամանակ ասել էր, որ 1100 ուսումնական հաստատություններում մրցող 520,000 մարզիկների մեջ 10-ից էլ քիչ տրանսգենդեր մարզիկներ կան:

Միևնույն ժամանակ, հարցումները ցույց են տալիս, որ ամերիկացիների մեծ մասը դեմ է տրանսգենդերների մասնակցությանը իրենց գենդերային ինքնությանը համապատասխանող սպորտաձևերին:

Սպիտակ տունը ավելի վաղ արգելել էր դաշնային առողջապահական ծրագրերին վճարել 19 տարեկանից երիտասարդների տրանսգենդերային անցման համար, իսկ Պենտագոնին հանձնարարվել էր բացառել բոլոր տրանսգենդերներին ԱՄՆ բանակից:

Հունվարի 20-ին էլ  Թրամփի կողմից ստորագրված առաջին հրամանը պետական ​​աշխատողներին հանձնարարում է բացառապես օգտագործել «սեռ» տերմինը, այլ ոչ թե «գենդեր», միաժամանակ սեռը դիտվում է որպես «անփոփոխ կենսաբանական իրականություն», որը բացառում է գենդերային ինքնությունը փոխելու հնարավորությունը։

Թարգմանությունը՝ Էմմա Չոբանյանի