Թուրքիայում ընդդիմադիր պատգամավորի նկատմամբ հետաքննություն է սկսվել՝ խորհրդարանում Էրդողանին վիրավորելու համար

Ստամբուլի դատախազները հետաքննություն են սկսել պատգամավոր Ջեմալ Էնգինյուրթի նկատմամբ, որը վերջերս միացել է գլխավոր ընդդիմադիր Ժողովրդահանրապետական կուսակցությանը (CHP), խորհրդարանում նախագահ Ռեջեփ Թայիփ Էրդողանին, իբր, վիրավորելու և սպառնալից արտահայտությունների պատճառով։ Իշխանությունները գործել են առանց պաշտոնական բողոքի, գրում է Turkish Minute-ը։

Հետաքննությունը հիմնված է Էնգինյուրթի ելույթի վրա, որն ավելի վաղ հնչել էր խորհրդարանում խմբակցության նիստում:

«Պալատներում ապրող Յազիդ լինելու փոխարեն՝ մենք կնմանվենք նահատակ Հուսեյնին Քարբալայի անապատներում: Ահա թե ինչու ես դիմում եմ վախի այս կայսրության ստեղծողին, այս միանձնյա կառավարման ճարտարապետին, բռնաճնշումների և բռնակալության կատարողին։ Ամո՛թ մեզ, եթե չխորտակենք այն։ Ամո՛թ մեզ, եթե մենք չստիպենք ձեզ կիսել մեր ճակատագիրն այն բանտերում, որտեղ մենք անարդարացիորեն պահվում ենք»,- դիմելով Էրդողանին՝ ասել էր պատգամավորը։

Յազիդի և Հուսեյնի մասին Էնգինյուրթի հիշատակումը խորը պատմական և կրոնական նշանակություն ունի: Յազիդ I-ը Օմայադ խալիֆ էր, որին շատ մուսուլմաններ լայնորեն նախատում էին 680 թվականին Քարբալայի ճակատամարտում Մուհամեդ մարգարեի թոռան՝ Հուսեյն իբն Ալիի սպանությունը պատվիրելու համար։ Հուսեյնի նահատակությունը նշվում է ամեն տարի շիա մահմեդական ավանդույթներում՝ որպես բռնակալության դեմ դիմադրության խորհրդանիշ։

Էնգինյուրթը, որը ծայրահեղ աջ «Ազգայնական շարժում» կուսակցության (MHP), իսկ ավելի ուշ՝ աջ կենտրոնամետ Դեմոկրատական կուսակցության անդամ էր, երեքշաբթի միացել է CHP-ին՝ կուսակցության առաջնորդ Օզգյուր Օզելի մասնակցությամբ արարողության ժամանակ։

Պատգամավորի նկատմամբ հետաքննությունը Թուրքիայում այլախոհության դեմ ավելի լայն պայքարի մաս է, որտեղ իշխանությունները նախագահին վիրավորելը քրեականացնող օրենքներ են կիրառում՝ թիրախավորելու հազարավոր մարդկանց, այդ թվում՝ քաղաքական գործիչների, լրագրողների և շարքային քաղաքացիների:

Թարգմանությունը՝ Էմմա Չոբանյանի