13.04.2026 | 21:52
Դավիթ Մինասյանին «Նաիրի» ԲԿ-ից տարան բանտ․ փաստաբան
45 օր՝ մթության մեջ․ տարեց Ասլանյանների ընտանիքն ընդդեմ ՀԷՑ-ի․ ՏԵՍԱՆՅՈՒԹ
Հասարակություն
05.02.2025 | 20:30
Էդուարդ և Սուսաննա Ասլանյաններն արդեն 1,5 ամիս է՝ լույս չունեն․ 60 և 68-ամյա քույր ու եղբայր երկուսով են ապրում։ Այս ցուրտ եղանակին միայն առավոտյան՝ մի քանի ժամով են միացնում գազի վառարանը, իսկ երեկոյան մութն ընկնելուց հետո ստիպված պառկում են քնելու։
Ասլանյաններն առողջական խնդիրներ ունեն, Էդուարդը՝ 2-րդ կարգի հաշմանդամություն։ Թոշակով ապրող ընտանիքը մի կերպ է ծայրը ծայրին հասցնում։ Իսկ հոսանքի անջատումը կապում են կամայականությունների հետ։
Տարեց տղամարդու խոսքով՝ այդ օրը տեսուչն ու ևս մեկ հոգի մոտեցել են իրեն ու սպառնացել՝ եթե խոշոր չափի գումար չվճարի, կհոսանքազրկվի։ Ըստ Էդուարդի՝ հենց 2021 թվականին է նկատել, որ իր սպառած էլեկտրաէներգիայի ծախսն ավելացել է՝ հասնելով մի քանի հարյուր կիլովատտի, այն դեպքում, երբ փոքրիկ բնակարանում ապրում են երկուսով՝ կենցաղային սարքերից օգտագործելով միայն սառնարան, մեկ հեռուստացույց և համակարգիչ, այն էլ՝ ոչ ամեն օր։
Ասլանյանները 2021 թվականից այս խնդրով դատարաններում գործ ունեն․ մի դեպքում՝ հայցվորի, մյուսում՝ պատասխանողի կարգավիճակով։ ՀԷՑ-ը դեռևս 2021 թվականի հունիսին է հայց ներկայացրել Էդուարդ Ասլանյանի դեմ՝ գումարի բռնագանձման պահանջով։ Ասում է՝ նիստերից մի քանիսին ներկա գտնվել չի կարողացել․ ոտքն էր կոտրել, քայլել չէր կարողանում։
Հարկադիր կատարման ծառայությունը, սակայն, չի կարողացել կատարել դատարանի վճիռը, քանի որ արձանագրել է՝ Ասլանյաններից բռնագանձելու ոչինչ չկա։
Խնդրի մասով Factor TV-ն դիմեց Հայաստանի էլեկտրական ցանցերին։ Գլխավոր տնօրենի տեղակալ, իրացման գծով տնօրեն Դավիթ Ղազինյանն ասաց՝ անձամբ է խոսել Ասլանյանի հետ։ Factor TV-ի հարցին՝ արդյո՞ք երբևէ հաշվիչը ստուգումների ենթարկվել է, Ղազինյանը պատասխանեց՝ պետք է գրավոր պահանջ լիներ բաժանորդի կողմից։ Ստացվում է, որ սոցիալական վատ պայմաններում ապրող ընտանիքն էլեկտրաէներգիա չի ունենա, քանի դեռ չի՞ վճարել գումարը․ Ղազինյանն ասաց՝ կարգն է այդպես։
Ըստ նրա՝ առաջարկվել է գումարը մաս-մաս վճարել, սակայն Ասլանյանը մերժել է այն։ Էդուարդ Ասլանյանը հակադարձում է՝ չեմ օգտագործել, ի՞նչը վճարեմ։ Փաստացի, եթե կողմերն այդպես էլ փոխհամաձայնության չգան, ընտանիքն այդպես էլ կմնա առանց լուսավորության։
Դեկտեմբերի 21-ից քույր ու եղբայր ստիպված են երեկոները մթության մեջ անցկացնել՝ առանց հեռուստացույցի, տաք ջրի և կապի միջոցների։ Էդուարդը պատմում է՝ անգամ Ամանորին, երբ խնդրել էր մի քանի ժամով, գոնե սիմվոլիկ միացնել հոսանքը, կտրուկ մերժում է ստացել։
Մանրամասները՝ տեսանյութում։
Ռոզա Վարդանյան
