10.08.2026 | 13:40
Կանանց NBA-ում 3 միավորանոց նետումների ռեկորդ է գրանցվել. ՏԵՍԱՆՅՈՒԹ
Թրամփի հայտարարություններից հետո Պենտագոնը Սիրիայից ԱՄՆ զորքերի ամբողջական դուրսբերման պլաններ է մշակում. NBC
Քաղաքականություն
05.02.2025 | 21:28
Պենտագոնը պլաններ է մշակում Սիրիայից ամերիկյան զորքերն ամբողջությամբ դուրս բերելու համար։ Այս մասին NBC News-ին հայտնել են ԱՄՆ պաշտպանության ոլորտի երկու պաշտոնյաներ։
Նրանք ասել են, որ նախագահ Դոնալդ Թրամփը և նրան մոտ կանգնած պաշտոնյաները վերջերս շահագրգռվածություն են հայտնել ամերիկյան զորքերը Սիրիայից դուրս բերելու հարցում, ինչը ստիպել է Պենտագոնի պաշտոնյաներին 30, 60 կամ 90 օրվա ընթացքում լիարժեք դուրսբերման պլաններ մշակել:
Ըստ աղբյուրների՝ Թրամփի ազգային անվտանգության հարցերով նոր խորհրդական Մայք Ուոլցն անցյալ ուրբաթ անցկացրել է ԱՄՆ կենտրոնական հրամանատարության շտաբում՝ Ֆլորիդայի Տամպայում՝ հանդիպելով բարձրաստիճան զինվորականների հետ և զեկույց ստացել Մերձավոր Արևելքում իրավիճակի մասին։
«Լավ է, որ Ուոլցն այցելել է CENTCOM՝ ամբողջ տարածաշրջանի մասին պատկերացում կազմելու համար»,- ասել է Սպիտակ տան պաշտոնյան։
Պենտագոնի խոսնակը հրաժարվել է մեկնաբանություններից։
Անցյալ հինգշաբթի լրագրողներից մեկը Օվալաձև աշխատասենյակում միջոցառման ժամանակ Թրամփին հարցրել էր այն տեղեկությունների մասին, որ նա հայտնել էր Իսրայելի կառավարությանը ամերիկյան զորքերը Սիրիայից դուրս բերելու մասին:
«Ես չգիտեմ՝ ով է դա ասել, բայց մենք դրա վերաբերյալ որոշում կկայացնենք։ Մենք չենք միջամտում, ներգրավված չենք Սիրիայում։ Սիրիայում խառնաշփոթ է։ Նրանց պետք չէ, որ մենք ամեն ինչում ներգրավվենք»,- ասել էր Թրամփը։
2019 թվականի վերջին Դոնալդ Թրամփը պաշտպանության նախարար Ջեյմս Մեթիսին հրամայել էր դուրս բերել ամերիկյան զորքերը Սիրիայից։ Մեթիսը հետ էր մղել ծրագիրը և, ի վերջո, հրաժարական տվել՝ ի նշան բողոքի:
Թրամփը դուրս էր բերել ամերիկյան զորքերի մեծ մասը, սակայն հետո վերադարձրել էր։ Այդ ժամանակից ի վեր ԱՄՆ-ի ներկայությունը Սիրիայում շարունակվում է։
Դեկտեմբերին Պենտագոնը հայտարարել էր, որ Սիրիա է ուղարկել մոտ 2000 զինվորականի, ինչը կրկնակի գերազանցում է այն թիվը, որը զինվորականներն ասում էին տարիներ շարունակ՝ շուրջ 900:
Թարգմանությունը՝ Էմմա Չոբանյանի
