Կապիտոլիումի գրոհի գործ․ ՀԴԲ գործակալները դատի են տվել ԱՄՆ Արդարադատության նախարարությանը

Հետաքննությունների դաշնային բյուրոյի ինը գործակալներ հայց են ներկայացրել ԱՄՆ Արդարադատության նախարարության դեմ՝ 2021 թվականի հունվարի 6-ին Դոնալդ Թրամփի կողմնակիցների կողմից Կապիտոլիումի գրոհի գործով հետաքննության առնչությամբ։ Փետրվարի 4-ին նրանք Վաշինգտոնի դաշնային դատարանից խնդրել են արգելափակել Արդարադատության նախարարության և գլխավոր դատախազի պաշտոնակատար Ջեյմս Մաքհենրիի ջանքերը՝ հետաքննության մեջ ներգրավված գործակալների մասին տեղեկություններ հավաքելու համար, փոխանցում է DW-ի ռուսական ծառայությունը:

Հայցվորների անունները չեն հրապարակվում՝ ելնելով նրանց անվտանգությունից։ Հայցը ներկայացվել է այն բանից հետո, երբ Թրամփի նախկին իրավաբան, գլխավոր դատախազի տեղակալ Էմիլ Բովը խնդրել է ՀԴԲ աշխատակիցներին լրացնել ձևաթղթեր մինչև փետրվարի 5-ը, որտեղ մանրամասն նկարագրված է նրանց մասնակցությունը Կապիտոլիումի անկարգությունների հետաքննությանը:

Աշխատակիցների մասին տեղեկատվության հավաքումը «քաղաքական զտումների» մի մասն է, որը նախաձեռնվել է որպես «քաղաքական դրդապատճառներով հաշվեհարդար» Թրամփի՝ Սպիտակ տուն վերադառնալուց հետո, կարծում են հայցվորները։

«Այս հրամանն անօրինական է և տրվել է որպես հաշվեհարդարի ձև»,- ասում են նրանք։

Հայցում նաև ասվում է, որ անցյալ շաբաթ Արդարադատության նախարարությունն աշխատանքից ազատել է մի քանի բարձրաստիճան պաշտոնյաների, որոնք ներգրավված էին Թրամփի դեմ հետաքննության մեջ:

Հայցվորները հայտարարել են, որ իրենք ներկայացնում են ՀԴԲ-ի առնվազն 6,000 գործող կամ նախկին աշխատակիցների, որոնք ինչ-որ կերպ ներգրավված են եղել «Դոնալդ Թրամփի կամ նրա անունից հանդես եկող անձանց հանցավոր վարքագծի և իշխանության չարաշահման» հետաքննության մեջ։

Թարգմանությունը՝ Տաթև Ֆռանգյանի