Զելենսկին հայտնել է պատերազմում ուկրաինական և ռուսական կողմերի կորուստների մասին

Ռուսաստանի դեմ պատերազմում զոհվել է շուրջ 45,100 ուկրաինացի զինվոր, մոտ 390,000-ն էլ վիրավորում է ստացել։ Այս մասին հայտարարել է Ուկրաինայի նախագահ Վլադիմիր Զելենսկին բրիտանացի լրագրող Պիրս Մորգանին տված հարցազրույցում, փոխանցում է DW-ի ռուսական ծառայությունը։

«Հստակեցնեմ՝ վիրավորների թիվն ավելին է, քանի որ կան մարդիկ, որոնք վիրավորվել են, հետո վերադարձել մարտի դաշտ ու նորից վիրավորվել»,- ասել է նա։

Զելենսկին նաև գնահատել է ռուսական կողմի կորուստների թիվը։ Նրա խոսքով՝Ուկրաինա ներխուժման ժամանակ սպանվել է մոտ 350 հազար ռուս զինվոր, ևս 600-700 հազարը վիրավորվել է։

Դեկտեմբերի սկզբին Զելենսկին հայտնել էր, որ լայնամասշտաբ պատերազմի սկզբից ի վեր 43 հազար ուկրաինացի զինվոր է մահացել, ևս 370 հազարը՝ վիրավորվել։ Միևնույն ժամանակ, ըստ նրա, «վիրավորների մոտ 50 տոկոսը վերադառնում է ծառայության, և գրանցվում են բոլոր վնասվածքները՝ ներառյալ աննշան և կրկնվողները»։

Սակայն UALosses նախագիծը, որը բաց տվյալների հիման վրա տեղեկություններ է հավաքագրում Ուկրաինայի կորուստների մասին, գրում է ավելի քան 63 հազար զոհի մասին։

The Economist-ը նոյեմբերի վերջին հայտնել էր, որ Ուկրաինան կարող էր կորցնել 60,000-ից մինչև 100,000 զինվոր Ռուսաստանի լայնածավալ ներխուժման սկզբից ի վեր: Եվս 400,000 ուկրաինացի զինվոր կարող էր վիրավորվել այնպես, որոնք կխանգարեին նրանց վերադառնալ ծառայության։ Լրատվամիջոցն այս մասին գրել էր՝ վկայակոչելով արևմտյան հետախուզական գործակալությունների տվյալները, ԱՄՆ վարչակազմի պաշտոնյաների հայտարարությունները և բաց աղբյուրներից ստացված տեղեկություններ:

Թարգմանությունը՝ Էմմա Չոբանյանի